27 mart 2012 15:20
“Qarabağla oyunun penaltilərə qədər getməsini istəmirəm”
“Qəbələ”nin hücumçusu Deon Barton Azərbaycan kubokunun 1/4 final mərhələsinin sabah baş tutacaq “Qarabağ”la cavab oyunu öncəsi fikirlərini açıqlayıb. Azerisport.az saytına müsahibəsində o, həm də “İnter” üzərində son turda qazandıqları qələbəyə də toxunub.
“Mən həmişə demişəm ki, “Qarabağ” Azərbaycanın ən yaxşı komandalarındandı. Onlara qarşı oynamaq həmişə çətindi. Amma hər şeyə rəğmən, növbəti mərhələyə adlamaq üçün əlimizdən gələni edəcəyik. Əlbəttə, doğma meydanda qollu heç-heçə etməyimiz xeyrimizə deyil. Amma hər halda səfərdə də qələbə qazanmaq mümkünsüz deyil”.
Barton bu qələbəni matçın əsas vaxtında əldə etmək istədiklərini bildirib: “Mən hər şeyin penaltilərə qədər uzanmasını istəmirəm. Əsas vaxtda qələbə qazanmaq daha yaxşı olardı. Hesabın necə olması önəmli deyil. Əsas növbəti mərhələyə adlamaqdı. Baxmayaraq ki, bizi çox çətin oyun gözləyir”.
Yamayka yığmasının sabiq forvardı bu komandayla cari mövsümdə baş tutan oyunlarda 3 heç-heçəyə razılaşıb, 1 qələbəyə qazanmalarına dair bunları söyləyib: “Əlbəttə, bu, sadəcə statistikadı. Lakin bu dəfə heç-heçə etmək yox, qələbə qazanmaq istəyirik”.
Barton sonda “İnter” üzərində qələbəyə də toxunub: “Maraqlı və çətin oyun alındı. Bu qarşılaşma üçün məlum oyun planımız var idi. Bütün komanda həmin planı həyata keçirmək üçün əlindən gələni etdi. Nəticədə də çox vacib qələbəyə imza atdıq”.
