30 mart 2012 01:34
XL futbolçuları Mais Mənsimova söz verdilər (FOTOLAR)
Ötən gün “Palmalife Lenkeran Resort” otelində “Xəzər Lənkəran” Futbol Klubunun rəhbərliyi və komanda üzvlərinin iştirakı ilə şam yeməyi baş tutub. Azerisport.az xəbər verir ki, görüşdə istirak edən və bu görüşün təşəbbüskarı olan klubun prezidenti Mais Mənsimov hər zaman olduğu kimi, klub rəhbərliyi tərəfindən komandaya tam olaraq bütün lazımi dəstəyin olduğunu bildirib.
Son oyunlarda göstərilən nəticələr gözləntiləri əks etdirməsə də, “Xəzər Lənkəran” prezidenti qarşıdakı görüşlərdə komandanın oyununda müsbət dəyişikliklərin olacağına inamını futbolçu və məşqçi heyətinin nəzərinə çatdırıb. Mənsimov klub daxilində olan ümumi yüksək ab-havanı müsbət dəyərləndirdiyini və bunun komandanın yaxşı oyun sərgiləməsi üçün çox vacib amil hesab etdiyini vurğulayıb.
Komandanın üzvləri də öz növbələrində rəhbərlik tərəfindən bütün hallarda nümayiş etdirilən dəstək və inama görə klub prezidenti Mais Mənsimova təşəkkürlərini bildiriblər. Futbolçu heyəti və məşqçilər korpusu komandanın oyununa görə üzərlərinə düşən məsuliyyəti anladığıqlarını bildirib. Komanda üzvləri nəticələrin müsbət istiqamətdə dəyişməsi üçün tam güclə çalışmağa davam edəcəklərini klub prezidentinə söz veriblər.
