30 mart 2012 17:18
Azərbaycan derbisi tarix və rəqəmlərin dili ilə
Bazar günü Azərbaycan derbisi baş tutacaq. Azerisport.az xəbər verir ki, Premyer Liqanın final mərhələsinin 4-cü turunda “Qarabağ” “Neftçi”ni qəbul edəcək.
Görüş eyni zamanda ilk 2 pillədə qərarlaşanların dueli kimi də yadda qalacaq. Bütün çempionatların iştirakçısı olan tərəflər tarixlərində 59-cu, çempionatlarda isə 47-ci dəfə qarşılaşaqlar.
Derbi öncəsi qarışdurmayla bağlı bütün maraqlı faktları diqqətinizə çatdırırıq.
*** İndiyə kimi tərəflər arasında 58 oyun keçirilib
*** 58 oyunun 46-sı çempionatda, 12-si isə kubokda baş tutub
*** Hər 2 klub bütün çempionatların iştirakçısı olsa da, 1993-cü ildə baş tutan 2-ci çempionatda tərəflər reqlamentlə əlaqədar üz-üzə gəlməyiblər
*** Tərəflər arasında ilk görüş 1992-ci ilin sentyabrın 26-sında baş tutub. Mərkəzi arenada baş tutan görüşdə ağdamlılardan Zaur Qarayev derbidə ilk qolun müəllifi kimi düşsə də, Rüstəm Rəhimovun idarə etdiyi matç Beydiyevin cavab qoluyla matç 1:1 başa çatıb.
*** Oktyabrın 20-sində isə “İmarət” stadionunda ilk görüş baş tutdu. Bu dəfə də Beydiyev bakılıların heyətində fərqlənsə də, Elşad Əhmədov və Mahir Əliyevin qolları Ağdam klubunun ilk qələbəsini reallaşdırıb.
*** Bu tərəflərin çempionatda “İmarət” stadionunda baş tutduğu yeganə oyun olub (hələlik)
*** “Qarabağ” “İmarət”də baş tutan 2-ci və sonuncu oyunda da “ağ-qaralar”a qalib gəlib. 1993-cü il mövsümünün kubokunun ¼ finalında bu komanda yenə 2:1-lik qələbə qazanıb. 28 apreldə baş tutan oyun Ağdamda sonuncu olub. (“Qarabağ” cavab oyununda qolsuz bərabərliklə mərhələ adladı və sonda “qızıl dubl” etdi)
*** Ümumiyyətlə, “Neftçi” müstəqilliyimizin ilk illərində “Qarabağ”ı yenməkdə çətinlik çəkib. İlk 7 derbidə “Qarabağ” “Neftçi”yə qələbə sevinci yaşamağa imkan verməyib.
*** “Neftçi” ilk dəfə 1994/1995 mövsümündə evdə 3:2-lik qələbəyə sevinib.
*** Çempionatda “Neftçi” 14, “Qarabağ” 12 qələbə qazanıb.2000-2001 mövsümündə “Neftçi”yə 3:0-lıq texniki qələbə verilib
*** Kubokda ağdamlılar 5 dəfə, bakılılar 3 dəfə qələbəyə sevinib.
*** 58 oyunda “Neftçi” 55, “Qarabağ” isə 45 qol vurub
*** “Qarabağ” səfərdə “ağ-qaralar”a 2006-cı ilin fevralın 16-da məğlub olduqdan sonra 2010-un noyabrın 28-inə kimi 1873 gün rəqibinə 11 oyunda uduzmamaqla ən uğurlu seriyanı əldə edib.
*** “Qarabağ” – “Neftçi” duellərində ən çox qol vuran futbolçu Müşfiq Hüseynovdu (8)
*** “Neftçi”nin heyətində “Qarabağ”a ən çox qol vurmuş futbolçu Qurban Qurbanovdu (5)
*** “Qarabağ”ın baş məşqçisi Qurban Qurbanov, köməkçisi Müşfiq Hüseynovdu
*** Nazim Əliyev, Georgi Adamiya, Tərlan Əhmədov, Vidadi Rzayev hər 2 komandanın heyətində fərqlənən futbolçulardı
*** Səttar Əliyev “Neftçi”yə qol vurmaqla yanaşı bir oyunda avtoqola imza atıb.
*** Duellər tarixində digər avtoqollara isə Elxan Müslümov və Admir Teli imza atıb (Qarabağ)
*** Duellər ərzində tərəflər hərəyə 2 dəfə (“Qarabağ” - Mehman Alışanov, Emin Salmanov. “Neftçi” - Qurban Qurbanov, Yunis Hüseynov) penaltidən qola sevinsələr də, mayın 13-də Adamiya fərqlənməklə “Qarabağ”ı bir addım önə çıxardı
*** Adamiya eyni zamanda duellər tarixində het-trik edən yeganə futbolçudu. 30 yaşlı forvard sabiq komandasına 3 qol vurmaqla “Qarabağ”ın “Neftçi” üzərində yeganə böyükhesablı qələbəsini qazandırıb
*** Elə “Neftçi” də cəmi bir dəfə bunu bacarıb. 2000-ci ilin noyabrın 4-də Respublika stadionunda “ağ-qaralar”ın 4:0-lıq qələbəsi qeydə alınıb
*** Elə həmin çempionatda “Qarabağ”ın heyətində lisenziyası olmayan futbolçular meydana çıxdığına görə “Neftçi”yə texniki qələbə verilib
*** “Neftçi”yə ötən mövsümkü məğlubiyyətə qədər “ağ-qaralar” “Qarabağ`ı yendiyi zaman (27 aprel 2007, 0:2) baş məşqçisi Qurban Qurbanov olub. Qollardan birinə isə hazırda “Qarabağ”ın şərəfini qoruyan Adamiya imza atıb
*** Tərəflər arasında mücadilə ən çox 2003-04 mövsümündə azarkeş toplayıb (15500)
*** “Qarabağ” – “Neftçi” arasında sadəcə 1 oyunda vərəqə göstərilməyib. Həmin oyundan 11 il keçir
*** İndiyə kimi derbidə 9 qırmızı vərəqə göstərilib
*** Aslan Kərimov 2 dəfə meydanı vaxtından əvvəl tərk etməklə liderdi
*** Qırmızı vərəqə alanlardan Arif Əsədov “Neftçi”nin baş məşqçisi olub, Elçin Rəhmanov isə `hazırda “Qarabağ”ın məşqçisidi
*** Hazırda 8 futbolçu hər 2 komandanın heyətində top qovub
*** Tərəflər ən Respublika stadionunda qarşılaşıblar. 27 dəfə
*** İndiyə kimi tərəflər 5 şəhər, 4 qəsəbə, 11 stadionda üz-üzə gəliblər
*** Derbini ən çox Xəqani Məmmədov (11), Rövşən Əhmədov (8) Vüsal Əliyev (7) idarə ediblər.
"Qarabağ"ın mətbuat xidməti
