31 mart 2012 11:43
Yannik Kamanan Premyer Liqada heç kimin bacarmadığını etdi
Bitməkdə olan mart ayının ən məhsuldar futbolçusu rekordla diqqət çəkib. Azerisport.az xəbər verir ki, bu “Qəbələ”nin hücumçusu Yannik Kamanandı. Fransalı legioner ay ərzində baş tutan çempionatın 5 turunda rəqibləri üçün əsl kabus oldu.
2-ci turun “Rəvan”la səfər matçında dubla imza atan futbolçu ardınca “Kəpəz”lə təxirə salınan 19-cu turun Gəncədəki oyununda da meydanı qolsuz tərk etmədi. Final mərhələsinin ilk oyununda “Neftçi”nin darmadağına 2 qolla töhfə verən Kamanan ardınca “Qarabağ”la görüşdə “sussa” da “İnter”in də qapısına qol vurdu.
Bir ay ərzində 6 qol vuran Yannik bununla da həm Premyer Liqada martın ən məhsuldar futbolçusu oldu, həm “Ayın futbolçusu” adına əsas namizəd olduğunu ortaya qoydu, həm də rekord vurdu. Belə ki, cari mövsümün oyunları keçirilən 7 ay ərzində heç bir futbolçu aya 6 qol vurmayıb.
Qeyd edək ki, ötən ilin sentyabrında Luis Hilario, oktyabrında isə Deon Barton ay ərzində ən çox qol vuran futbolçular arasında olub. Lakin həmin vaxt əvvəl 10, sonra 7 futbolçu eyni sayda qolla liderlik edib. (klubun saytı)
