2 aprel 2012 17:14
Dünya çempionatının təbliğatı davam edir (FOTOREPORTAJ)
FIFA U-17 qadınlararası dünya çempionatı Azərbaycan 2012-nin Yerli Təşkilat Komitəsinin ümayəndələri Azərbaycan Dövlət İqtisad Universitetinin əsas korpusunda tələbələrlə görüş keçiriblər. Azerisport.az xəbər verir ki, “Könüllülük Layihəsi” çərçivəsində təşkil olunmuş təbliğat xarakterli tədbirdə tələbələrə çempionata ümumi hazırlıq çərçivəsində görülən tədbirlər haqda məlumat verilib, bu tip beynəlxalq tədbirin ölkəmiz üçün əhəmiyyəti ətrafında müzakirələr aparıblar.
Gənclər həmçinin FIFA-nın dünya çempionatları, qadın futbolu və Azərbaycanda keçiriləcək çempionatın gedişatı barədə məlumatlandırılıblar. Təqdimat zamanı gənclərə dünya çempionatında onlar üçün yaradılmış ən geniş imkanlardan biri olan Könüllülük Proqramı, könüllü olmağın xeyirləri, perspektivləri və proqramda iştirak şərtləri ilə bağlı ətraflı şəkildə məlumat verilib. Daha sonra çempionatla bağlı kiçik müsabiqədə qalib gələn şəxslərə promo materiallar təqdim olunub.
