3 aprel 2012 00:03
Beşiktaş baş məşqçi dəyişikliyinə əl atdı
Türkiyənin “Beşiktaş” klubunda baş məşqçi dəyişikliyi baş verib. Azerisport.az xəbər verir ki, klub rəhbərliyi ötən gün keçirilən 5 saatlıq iclasın ardından portuqaliyalı mütəxəssis Karlos Karvalhalın istefasına qərar verib.
“Beşiktaş”ı 47 rəsmi matça çıxaran baş məşqçinin xüsusilə son dövrlərdə yaşadığı uğursuzluqlar ona postu bahasına başa gəlib. Yıldırım Demirörenin Türkiyə Futbol Federasiyasına prezident getməsindən sonra “ağ-qaralar”ın başqanı seçilən Fikret Ormanın ilk önəmli işi məhz Karvalhalı baş məşqçi postundan uzaqlaşdırmaq olub.
Qeyd edək ki, portuqaliyalı “Beşiktaş”la çıxdığı 47 matçda 22 qələbəyə sevindiyi halda, 16 dəfə məğlubiyyət, 9 dəfə heç-heçə ilə üzləşib. Karvalhal başlanğıcda yaxşı nəticələr qazansa da, sonradan hər şey fərqli məcrada davam etməyə başladı. Öncə UEFA Avropa Liqasındakı, ardınca Türkiyə kubokundakı çıxışını başa vuran “qara qartallar” hazırda Super Liqada da çempionluq yarışından çox uzaq qalıb. Bu azmış kimi, son turda autsayderlər qrupunda qərarlaşan “Samsunspor”a 0:1 hesablı ev məğlubiyyəti Karvalhalın sonu oldu.
Artıq “Beşiktaş”ın yeni baş məşqçisi də müəyyənləşib. Bu, mövsümün əvvəlində Türkiyə futbolundakı danışılmış oyunlarla əlaqədar olaraq həbs olunan, lakin bir müddət sonra günahsız olduğu sübut olunduqdan sonra azadlığa buraxılan komandanın sabiq baş məşqçisi Tayfur Havutçudu. Maraq üçün qeyd edək ki, məhz Havutçunun həbsdən gec çıxmasının ardından klub rəhbərliyi onun postunu müvəqqəti olaraq Karvalhala tapşırmışdı. Amma Havutçu azadlığa çıxdığı zaman da Karvalhalla işlər yolunda olduğu üçün, bu işbirliyinə toxunulmamış, sabiq baş məşqçi klubda ayrı bir vəzifə ilə təmin olunmuşdu. Ötən mövsüm komandasına Türkiyə kubokunu qazandırmış Havutçunun köhnə-yeni postunda bu dəfə nə qədər uğurlu olacağını isə zaman göstərəcək.
