Antonio Semedo: Bizə bütün oyunlarda qələbə qazanmaq lazımdı

“Xəzər Lənkəran”ın yarımmüdafiəçisi Antonio Semedo Premyer Liqanın 27-ci turunun “Qəbələ” ilə oyunu öncəsi azerisport.az saytının suallarını cavablandırıb.

 

- Qarşıda sizi “Qəbələ” ilə oyun gözləyir. Bu komanda barədə nə deyə bilərsiz?
- Çox güclü komandadı. Xüsusilə də hücum xəttində çıxış edən futbolçuları çox yaxşı oyun sərgiləyirlər. “Qəbələ” İngiltərə stilində oynayır. Əminəm ki, bizi çox çətin oyun gözləyir.

 

- Siz mart ayındakı bütün oyunlarda qol vurmağa nail olan Yannik Kamanan barədə heç nə demədiniz...

- Deməli, hər şeyi etməliyik ki, o, özünü iyun ayındakı kimi hiss etsin. Axı həmin ayda heç bir oyun keçirilmir və qol vurmaq da lazım gəlmir.

 

- Yunis Hüseynovun rəhbərliyi altında çalışmaq çətin deyil ki?
- Bizim hələ ki, yeni baş məşqçini daha yaxşı tanımaq imkanımız olmayıb. Biz onun təyinatından cəmi dörd gün sonra oyuna çıxdıq. Bu da xeyli çətinliklər yaratdı. Amma nəhayət “İnter”lə son oyunda qələbə qazana bildik. Fikrimcə, müəyyən vaxt keçdikdən sonra hər şey qaydasına düşəcək.

 

- “İnter”lə iki ardıcıl oyun keçirmək nə dərəcədə ağır idi?
- Çempionat oyunu tamamilə fərqlidi. Bu mövsüm biz bu komandayla artıq dörd oyun keçirmişdik, üçündə uduzub, birində heç-heçə oynamışdıq. Amma bu dəfə qələbə qazanmaq istəyirdik. Yeni taktikadan istifadə etdik. Düşünürəm ki, uğurlu alındı. Rəqibdən daha güclü idik.

 

- Yəni zaman keçdikcə “İnter”lə oyunlarda irəliləyişə nail ola bildiniz: öncə heç-heçə, ardınca qələbə...

- Biz onlarla kubok oyunlarında da yaxşı oynamışdıq. Birinci oyunda bəxtimiz gətirmədi və uduzduq. Cavab oyununda da uğur üzümüzə gülmədi. Çempionat oyununda isə xarakter göstərərək, qələbə qazandıq.

 

- Azərbaycan kubokunda kimi favorit görürsüz?
- Məni ancaq öz komandam maraqlandırır. “Xəzər Lənkəran” bu turnirdə yoxdursa, mənə də maraqlı deyil. Artıq bütün fikirlərim qarşıdakı “Qəbələ” ilə oyuna yönəlib. “İnter” üzərindəki qələbədən sonra özümüzə inam yüksəlib.

- Lakin “Neftçi”dən altı xal geridəsiz...

- İstənilən halda şansımız hələ də var. Futbolda hər şey olur. Bizi güclü komandalarla oyunlar gözləyirsə, “Neftçi”nin də xal itirmək ehtimalı az deyil. Altı xallıq fərq elə də çox deyil. Sadəcə, bütün oyunlarda qələbə qazanmaq lazımdı.