5 aprel 2012 12:44
Azərbaycanın böyük şirkətləri yeni arenanın adına iddialıdı
Xəbər verdiyimiz kimi, AFFA balansında olan stadionlardan daha da səmərəli istifadə etmək məqsədilə Bakı şəhəri, B. Nuriyev küçəsi, 2397-ci məhəllədə (şərti olaraq 8-ci km stadionu) inşa olunan, 11000 nəfər azarkeş tutumuna malik, təbii ot örtüklü stadionun kommersiya adının açıq sorğu üsulu ilə satılmasına qərar verib. Azerisport.az xəbər verir ki, 2012-ci ilin iyul ayında istifadəyə veriləcək 8-ci km stadionundan Azərbaycan milli komandası, eləcə də müxtəlif yaş qruplarından ibarət yığmalar, Premyer Liqa komandaları, AFFA-nın bayrağı altında təşkil olunan liqalarda çıxış edən komandalar istifadə edəcək, stadionda təlim-məşq toplanışlarını və rəsmi oyunlarını keçirəcəklər. Bu mənada, stadionun kommersiya adını əldə edən şirkət böyük üstünlüklərə malik olacaq.
AFFA-nın baş katibi Elxan Məmmədov saytımıza müsahibəsində bildirib ki, artıq 8-ci km stadionunun kommersiya adının açıq sorgu yolu ilə alınması üçün təkliflər alıblar: “Təkliflər var. Özü də az deyil. Onların arasında hətta Azərbaycanın böyük şirkətləri də var. Amma indidən həmin şirkətlərin adlarını açıqlamaq düz olmazdı. Çünki bu məsələ gizli saxlanılmalıdı”.
