7 aprel 2012 00:57
Fransa klubu elə bir səhvə yol verdi ki...
Fransanın “Toulouse” klubu kuryoz hadisə ilə üzləşib. Azerisport.az xəbər verir ki, bir klubdan futbolçu transfer edən Tuluza təmsilçisi ona görə ödəməli olduğu pulu başqa komandanın hesabına keçirib.
Fransızların bu səhvinə isə qardaş Türkiyə millisinin hücumçusu Umut Bulut səbəb olub. Məlum olduğu kimi, Fransa klubu bu oyunçunu yayda “Trabzonspor”dan transfer etmişdi. Lakin fransızlar bu transferə görə ödənilməli olan 802 min avroluq pulu Trabzon klubunun yox, “Ankaragücü”nün hesabına yatırıblar.
“Toulouse” rəsmiləri səhvlərini hadisədən bir müddət sonra anlayıblar. Onların bu barədə “Ankaragücü” klubuna yazdığı məktubdan sonra həmin pul geri qaytarılıb.
“Ankaragücü”nün rəsmisi Hikmet Hancıoğlu həqiqətən də ötən gün “Toulouse” klubunun onların hesabına 802 min avro pul yatırdıqlarını təsdiqləyib: “Mən dərhal məsələni rəhbərliyə çatdırdım. Kiçik araşdırmalardan sonra vəziyyət aydınlaşdı. İkitərəfli danışıqlardan sonra həmin məbləğ fransız klubuna geri qaytarıldı”.
