7 aprel 2012 14:08
Futbolçulara silahlı təhdid
Argentinanın “River Plate” klubunun futbolçularl Daniel Villalva və Xuan Kasares xoşagəlməz olayla üzləşib. Azerisport.az xəbər verir ki, ötən gün onlar bir qrup quldur tərəfindən saxlanılaraq soyulub.
Argentinanın ən qabaqcıl klublarının üzvləri eyni maşında yol gedərkən quldurlar onların qarşısını kəsib. Əllərində silah olan həmin şəxslər futbolçulardan maşınla bərabər üstlərindəki bütün əşyaları tələb ediblər. Təbii ki, silahlı quldurlar qarşısında aciz qalan oyunçular onların bütün tələblərini həyata keçirmək məcburiyyətində qalıblar.
Artıq “River Plate” bu məlumatı rəsmi saytı vasitəsilə təsdiqləyib. Onların məşqə gedərkən belə aqibətlə üzləşdikləri bildirilir. Məlumatda o da bildirilir ki, hər iki futbolçunun ayaq nahiyəsinə xeyli sayda zərbə endirilib. Lakin onların sağlıq durumunda elə də ciddi problem yoxdu.
Artıq Argentina polisi hadisə ilə bağlı geniş əməliyyat istintaq tədbirlərinə start verib.
