8 aprel 2012 12:54
Joze Alesio Tümendə saxlanıldı
Futzal üzrə dünya çempionatına vəsiqə uğrunda sabah Rusiya ilə cavab pley-off matçına çıxacaq Azərbaycan yığması artıq Tümendədi. Azerisport.az xəbər verir ki, Bakıda keçirilən ilk oyunda uduzmuş (2:3) millimiz cavab oyununu məhz bu şəhərdə keçirəcək.
Azərbaycan nümayəndə heyətini sözügedən şəhərdə yaxşı hava qarşılayıb. Lakin aeroportda komandamız bir qədər xoşagəlməz dəqiqələr yaşamalı olub. Belə ki, yığmamızın baş məşqçisi Joze Alesio saxlanılıb. Buna onun pasportunda möhür vurmaq üçün yerin olmaması səbəb olub. Amma müəyyən danışıqlardan sonra məsələ yoluna qoyulub və braziliaylı mütəxəssis komanda ilə birgə məskunlaşacaqları otelə yollanıb. Buna qədər isə yerli televiziya əməkdaşları futzalçılarımızdan Marat Salyanski və İlkin Hacıyevdən müsahibə götürməyə imkan tapıblar.
Hazırda Tümenin demək olar ki, bütün küçələrində Rusiya – Azərbaycan oyunu ilə bağlı afişalara rast gəlmək mümkündü. Oyun ətafında böyük ajiotaj olduğunu söyləmək olar. Qarşılaşma sabah 2500 azarkeş tutumuna malik “Çenralnıy” arenasında baş tutacaq. Azərbaycanlı azarkeşlər üçün cəmi 100 yer ayrılıb. AFFA funksionerləri həmyerlilərimizin daha fəal azarkeşlik etməsi üçün özləriylə birgə bəzi atributlar da götürüblər.
