9 aprel 2012 17:29
Çempionatımızın oyunu vertolyota görə yer dəyişdi
Futbol üzrə Azərbaycan birinci divizionunun bu gün keçirilməli olan “Şahdağ” – “Qaradağ Lökbatan” matçının yeri dəyişdirilib. Azerisport.az xəbər verir ki, 25-ci turun bu gün baş tutmalı olan qarşılaşması Qusar şəhər stadionunda keçirilməli idi.
Lakin görüşün həmin arenada keçirilməsi mümkün olmayıb. Buna isə sözügedən arenaya eniş edən vertolyotun xarab olaraq orda qalmasıdı.
Məsələ burasındadı ki, ötən gün Qusarın Zuxul və Yuxarı Tahircal kəndləri istiqamətində dağlıq ərazidə kol-kos yanması müşahidə olunub. Nəticədə yanğının söndürülməsinə Fövqəladə Hallar Nazirliyinin Dövlət Yanğından Mühafizə Xidmətinin müvafiq qüvvə və vasitələri və aviasiya dəstəsinin 1 ədəd helikopteri cəlb olunub. Lakin məhz həmin yanğının söndürülməsi üçün gələn vertolyot xarab olaraq, məcburi şəkildə Qusar şəhər stadionuna eniş etməli olub.
Bu günə qədər həmin nasazlığı aradan qaldırılmayan vertolyot arenadan çıxarılmadığı üçün, oyunun keçiriləcəyi stadion da dəyişdirilib. Matçın Quba Olimpiya Kompleksini stadionunda keçiriləcəyi gözlənilir.
