12 aprel 2012 16:42
Yunis Hüseynov: 6 xal silinsə, avrokuboklara düşməyimiz çətin olacaq
FİFA "Xəzər Lənkəran"ın 6 xalını silməyə hazırlaşır. Azerisport.az xəbər verir ki, buna cənub təmsilçisinin 2008/09 mövsümündə transfer etdiyi braziliyalı yarımmüdafiəçi Romulo Silvanonun FİFA-ya etdiyi şikayət səbəb olub.
Belə ki, dünya futbol qurumu “ağ-yaşıllar”ın hesabından 6 xalın silinməsini tövsiyə edib. Hazırda FİFA və “Xəzər Lənkəran” arasında bu məsələ ilə bağlı danışıqlar davam edir. Cənublular sözügedən futbolçuya olan borclarını ödədiklərini iddia edərək belə bir cəzanın verilməməsinə nail olmaq istəyirlər.
Sözügedən məsələ ilə bağlı “ağ-yaşıllar”ın baş məşqçisi Yunis Hüseynov saytımıza açıqlamasında bunları dilə gətirib: “Bundan mənim də xəbərim var. Amma başa düşə bilmirəm ki, futbolçunun borcu ödənilibsə, daha komandanın hesabından altı xal silinməsi nəyə lazımdı? Altı xalımızın silinməsi komandaya pis təsir edə bilər. Mən bunu heç təsəvvür edə bilmirəm. Elə olsa, bizə hətta avrokuboklara düşmək də çətin olacaq”.
Qeyd edək ki, hazırda 51 xalla Premyer Liqanın turnir cədvəlində 2-ci pilləni tutan “Xəzər Lənkəran” xalı silincəyi halda 45 xalla 4-cü pilləyə düşəcək.
