12 aprel 2012 17:45
Admir Teli: Qələbə 3 xaldan daha dəyərlidi
“Qarabağ” aprelin 14-də “Qəbələ”ylə qarşılaşacaq. Azerisport.az xəbər verir ki, bu, tərəflərin cari mövsüm kubok oyunlarını da nəzərə alsaq, 6-cı qarşılaşması olacaq.
Geridə qaln 5 görüşün 4-ündə bərabərlik qeydə alınıb, 1 oyunda isə ağdamlılar məğlubiyyətlə üzləşiblər. Sabah Qəbələyə yollanacaq komandanı bu dəfə də çətin sınaq gözləyir. “Qarabağ”ın müdafiəçisi Admir Teli klubun rəsmi saytına açıqlamasında oyun haqqında danışıb:
“3 ildən çoxdu “Qarabağ”dayam. Amma bu müddətdə cəmi 1 dəfə “Qəbələ”ni məğlub edə bilmişik. O da ötən mövsüm Suraxanıda olub - 3:0. Deyərdim ki, bəlkə Azərbaycan çempionatında “Qəbələ”dən güclü olanlar var. Amma bizə görə ən çətin “Qəbələ”di. Futbolda belə şeylər olur. Oyuna yaxşı hazırlaşmışıq. İnanıram ki, “Qəbələ”ylə oyunda sərfəli nəticə qazana biləcəyik. Amma bu məqamda “Qəbələ”ni digər rəqiblərdən fərqləndirmirik. Final mərhələsində hər qələbə 3 xaldan daha dəyərlidi. “Qəbələ” son oyunlarda uduzduğuna görə meydana aqressiv çıxacaq. Hər halda avrokuboklara az da olsa, ümidləri var. Amma bizim uduzmağa haqqımız yoxdu. Düzdü, futbolda hər şey olur. 4-5 aydı məğlub olmuruq. Qəbələdə qələbə qazanıb həm uğursuzluğa son qoymaq, həm də iddiamızı qorumaq istəyirik”.
