13 aprel 2012 13:15
33 gündə 4-cü dəfə
Futbol üzrə Azərbaycan Premyer Liqasının 28-ci turunda “Qəbələ” “Qarabağ”la qarşılaşacaq. Azerisport.az xəbər verir ki, Ağdam təmsilçisi son 33 gündə 4-cü dəfə Fatih Kavlakın yetirmələrinə rəqib olacaq.
2012-cü ildə artıq 3 dəfə görüşən rəqiblər, 2011/12 mövsümündə 6-cı duelə çıxacaq. Bu qarşılaşmalardan yalnız birincisində - Ağdamda baş tutan matçda “Qəbələ” qalib gəlmişdi. Sonrakı 4 oyun isə heç-heçə bitir. “Qəbələ” ilə “Qarabağ” müxtəlif hesablı - qolsuz, minimal, məhsuldar heç-heçə edib.
Ümumilikdə isə “Qəbələ” “Qarabağ”la 18-ci dəfə üz-üzə gələcək. Arxada qalan 17 oyunda cəmi 3 dəfə qalib gələn qəbələli futbolçular 6 dəfə uduzub. Lakin bu məğlubiyyətlərdən 5-i 2006-08-ci illərə təsadüf edən 5 ardıcıl oyunda qeydə alınıb. Sonrakı 12 matçda isə “Qarabağ” yalnız 1 dəfə sevinib. Rəqiblərin 17 oyununda 8 heç-heçə qeydə alınıb. Ağdamlılar top fərqində də hələlik üstündür – 21:16.
Qəbələdə keçiriləcək 9-cu qarşılaşmayadək meydan sahibləri 2 qələbə qazanıb, 3 heç-heçə edib və eyni sayda məğlubiyyət alıb. Lakin hər 3 ev yenilgisi 2006-08-ci illərdə gerçəkləşib. Həmin son ev məğlubiyyətindən sonrakı 1302 gündə “Qəbələ” 6 dəfə “Qarabağ”ı qəbul edib və uduzmayıb. Qəbələdəki oyunların top fərqin də qonaqların xeyrinədir – 10:11.
