13 aprel 2012 16:05
Və Xəzər Lənkəranın 6 xalı silindi
Bu gün AFFA İntizam Komitəsinin iclası keçirilib. Azerisport.az xəbər verir ki, aparılan müzakirələrdən sonra aşağıdakı qərarlar çıxarılıb.
FİFA-nın Nizam-İntizam Komitəsinin 30.11.2011-ci il tarixli qərarının 3-cü hissəsinin 4-cü bəndinə (Bu müddət ərzində borc ödənilmədiyi təqdirdə futbolçunun tələbinə əsasən klubun əsas komandasından təxirə salınmadan 6 xal çıxılsın. Xalların çıxılması yerli assosiasiya tərəfindən həyata keçirilsin) və FİFA-nın Nizam-İntizam Komitəsinin 29.03.2012-ci il tarixli təlimat məktubuna əsasən AFFA-nın İntizam Komitəsi tərəfindən aşagıdakı qərar qəbul olunub:
1. Premyer Liqa yarışlarında “Xəzər Lənkəran” FK-nun cari mövsümdə aktivindən 6 xal çıxılsın.
2. AFFA-nın bayrağı altında keçirilən bütün yarışlarda çıxış edən klubların nəzərinə çatdırılır ki, analoji hadisə ilə qarşılaşmamaları üçün FİFA, UEFA, AFFA və Lisenziyalaşdırmanın bütün tələbləri yerinə yetirilməlidir.
Qeyd edək ki, FİFA “Xəzər Lənkəran”ı komandanın keçmiş oyunçusu Ramulo Silvanın pulunu vaxtında ödəmədiyinə görə cəzalandırıb. Dünən AFFA pulun ödənilməsi barədə FİFA-ya məlumat verərək, cəzanın ləğvini istəmişdi. Lakin ali futbol qurumu Lənkəran klubu ilə bağlı qərarını qüvvədə saxlayıb.
“Xəzər Lənkəran” bu günə qədər 51 xalla turnir cədvəlində 2-ci pilləni tuturdu. 6 xalın siilinməsindən sonra isə Lənkəran klubu 45 xalla 4-cü yerə düşüb.
