13 aprel 2012 17:47
Baş katib FİFA-nın tədbirində çıxış edib (FOTOREPORTAJ)
Xəbər verdiyimiz kimi, İtaliyanın paytaxtı Romada FIFA, UEFA və İtaliya Futbol Federasiyasının təşkilatçılığı ilə «FIFA qadın futbolu konfransı» keçirilib. Azerisport.az xəbər verir ki, tədbirdə çıxış edən UEFA-nın I vitse-prezidenti Şenes Erzik, Avropa futbol qurumunun Milli Assosiyalar üzrə direktoru Teodor Teodoridis Azərbaycan Futbol Federasiyaları Assosiasiyasına bu il keçiriləcək FIFA U-17 qadınlararası dünya çempionatının təşkilati işlərində uğurlar arzulayıblar.
AFFA-nın baş katibi, FIFA U-17 qadınlararası dünya çempionatı Azərbaycan 2012-nin Yerli Təşkilat Komitəsinin sədri Elxan Məmmədov konfransda çıxış edib. Təqdimatın mövzusu FIFA U-17 qadınlararası dünya çempionatı Azərbaycan 2012-yə ev sahibliyi etməyin üstünlükləri və çətinlikləri olub. E.Məmmədov dünya çempionatının Azərbaycanda keçirilməsininən böyük səbəblərindən birinin dövlətin və ictimaiyyətin böyük dəstəyinin olmasını qeyd edib.Avropada və Azərbaycanda ilk dəfə keçiriləcək dünya çempionatının insanların yaddaşında unudulmaz xatirələr buraxacağını və Azərbaycanın dünyanın ən yaxşı U-17 qadınlararası dünya çempionatına ev sahibliyi edən ölkə kimi hafizələrdə qalacağına inandığını bildirib: «FIFA U-17 qadınlararası dünya çempionatı Azərbaycan 2012-nin Yerli Təşkilat Komitəsi olaraq, biz bu çempionatı FIFA mütəxəssislərindən, digər ölkələrdən beynəlxalq təcrübə qazanmaq, futbol və idman idarəçiliyində insan resurslarının və futbol üzrə infrastrukturun inkişaf etdirilməsi və beynəlxalq könüllülük imkanları ilə yeni gəncliyin daha bilikli və açıqfikirli olması üçün şans kimi görürük».
Təqdimat zamanı Elxan Məmmədov konfrans iştirakçıları önündə FIFA qadın futbolu səfiri və 2011-ci ildə Almaniyada təşkil edilən qadınlararası dünya çempionatının Təşkilat Komitəsinin prezidenti Steffi Consa ölkəmizdə keçirilən dünya çempionatın dostu olmasını təklif edib. Təklifi məmnuniyyətlə qəbul edən Steffi Consa Yerli Təşkilat Komitəsinin hədiyyəsi olaraq üzərində dünya çempionatın loqosu olan xalça hədiyyə olunub.
Təqdimatın sonunda Yerli Təşkilat Komitəsinin sədri bütün tədbir iştirakçılarını 22 sentyabrda Tofiq Bəhramov adına Respublika stadionunda keçiriləcək dünya çempionatının açılış mərasiminə dəvət edib. Sonda Elxan Məmmədov auditoriya tərəfindən verilən sualları cavablandırıb.
