13 aprel 2012 19:19
Xəzər Lənkəran FİFA-ya apellyasiya verəcək
“Xəzər Lənkəran” klubu FİFA-nın tələbi ilə AFFA İntizam Komitəsinin qərarından apellyasiya verəcək. Azerisport.az xəbər verir ki, bu haqda “Xəzər Lənkəran” klubunun direktoru Höccət Hacıyev məlumat verib.
O, FİFA-nın Apellyasiya Komitəsinə şikayət edəcəklərini bildirib. H.Hacıyevin sözlərinə görə, AFFA FİFA-nın tələbini yerinə yetirmək istəyirdisə, növbəti mövsümə -6 xalla başlamalarına dair qərar verə bilərdi: “Biz AFFA-dan daha ədalətli qərar gözləyirdik. Amma bu mövsüm futbolçularımızın, bütün komandanın alın təri bahasına əldə etdiyi 51 xaldan 6-sı silindi. Əgər FİFA futbolçuların tərəfini saxlayırsa, bəs klubun mənafeyini kim qorumalıdır? Sabah “Xəzər Lənkəran” buraxılsa, FİFA 20-25 futbolçumuzun pulunu ödəyəcək?”
Klub rəsmisi vəziyyətin bu həddə çatmasında “Xəzər Lənkəran”ın özündə də günahın olduğunu inkar etməyib. Onun sözlərinə görə, məsələ araşdırılacaq və günahkarlar tapılaraq cəzalandırılacaq: “Mən işin bilavasitə içində olmadığımdan, konkret günahkarın kim olduğunu deyə bilmərəm. Yəqin ki, günahkarlar layiqli cəzalarını alacaqlar”. (lent.az)
