14 aprel 2012 14:54
Premyer Liqamızda azarkeş davamiyyəti
Futbol üzrə Azərbaycan Premyer Liqasında fevral ayında baş tutmuş XX və XXI turlar çərçivəsində 12 qarşılaşma keçirilib. Azerisport.az xəbər verir ki, qarşılaşmaları ümumilikdə 13100 azarkeş canlı izləyib.
Qeyd edək ki, “Simurq” klubu cəzalı olduğundan fevral ayı ərzində Zaqatalada keçirdiyi hər iki qarşılaşmanı boş tribunalar önündə oynayıb. Fevral ayında ən çox azarkeş isə XX turda “Xəzər Lənkəran”ın doğma meydanda AZAL-ı minimal hesabla məğlub etdiyi qarşılaşmada qeydə alınıb – 6500 nəfər. Ən az azarkeş isə XXI turun AZAL – “Turan” qarşılaşmasında müşahidə olunub – 200 nəfər.
Ümumilikdə XX turda 8600, XXI turda isə 4500 azarkeş stadionlara gəlib. Premyer Liqanın fevral ayı ərzində hər oyununu orta hesabla 1091 azarkeş canlı izləyib.
Mart ayı ərzində isə beş tur keçirilib ki, bunlardan biri də təxirə salınmış XIX tur olub. Bundan əlavə XXII, XXIII, XXIV və XXV turların qarşılaşmaları da mart ayına təsadüf edib. Beş turda baş tutmuş 30 qarşılaşmanı 59600 azarkeş stadiondan izləyib. Ötən ayın ən çox azarkeş toplayan matçı XXIV turun “Xəzər Lənkəran” - “Bakı” qarşılaşmada qeydə alınıb – 9000 nəfər. XXIII turun “Sumqayıt” - “Rəvan” oyununu tribunalardan cəmi 100 azarkeş izləyib.
Mart ayı ərzində doğma azarkeşləri tərəfindən ən böyük dəstəyi “Kəpəz” klubu alıb. Belə ki, bu ayda Gəncə təmsilçisinin ev oyunlarını 15000 tamaşaçı izləyib.
Qeyd edək ki, XIX turda 11 100, XXII turda 13 800, XXIII turda 5 700, XXIV turda 18 700, XXV turda isə 10 300 azarkeş stadionlara gəlib. Ümumilikdə, Premyer Liqada mart ayı ərzində hər qarşılaşmanı orta hesabla 1986 azarkeş canlı izləyib. (PFL)
