14 aprel 2012 11:21
Premyer Liqa, 28-ci tur: Oqtay Abdullayevin proqnozu
Azərbaycanın veteran futbolçusu Oqtay Abdullayev azerisport.az saytına müsahibəsində Premyer Liqanın 28-ci turunun oyunları ilə bağlı proqnozlarını açıqlayıb.
Neftçi – İnter
Meydan sahibləri mütləq qələbə qazanmalıdılar ki, əsas izləyicilərindən daha da uzaqlaşıb, titula yaxınlaşsınlar. “Neftçi” hazırda yaxşı sürət yığıb. Amma eyni sözləri “İnter” haqda söyləmək olmaz. Hesab edirəm ki, bu görüşdə də “Neftçi” qalib gələcək.
Bakı – Xəzər Lənkəran
Fikrimcə, “Bakı” hazırda bütün fikirlərini Azərbaycan kubokuna yönəldib. Buna görə də paytaxt klubunun elə də güclü motivasiya ilə meydana çıxacağı inandırıcı görünmür. “Xəzər Lənkəran”ın bu oyun ərəfəsində altı xalı silinməsi komandaya pis təsir etsə də, düşünmürəm ki, onlar uduzacaq. Yunis Hüseynovun rəhbərliyi altında onlar öz oyunlarını tapmağa başlayıblar. Bu oyunda da cənubluların qələbə qazanacağını düşünürəm.
Qəbələ - Qarabağ
“Qəbələ” kubokda “Qarabağ”la duellərdən qalib çıxa bilmədiyi üçün indi həmin uğursuzluğun revanşını çempionatda almağa çalışacaq. Bölgə təmsilçisi yaxşı oyun sərgiləsə də, sabit çıxış etmir. Fikrimcə, bu oyunda heç-heçə qeydə alınacaq.
AZAL – Rəvan
Vaqif Sadıqovun gəlişindən sonra AZAL-da dəyişikliklər qaçılmazdı. Çünki hər bir baş məşqçi öz heyətini formalaşdırmağa çalışır. Sadıqovun ilk oyunu heç-heçə bitmişdi. Amma bu görüşdə onların qələbə qazanacağını düşünürəm.
Turan – Simurq
Bu komandaların hər ikisi gah yaxşı oynayır, gah da əksinə. Ona görə də bu komandaların oyununa proqnoz vermək çətindi. Bu üzdən də mən hansısa nəticə demək istəmirəm.
Sumqayıt – Kəpəz
Hər iki komandanın meydana qələbə üçün çıxacağı dəqiqdi. “Sumqayıt”ın istedadlı gənc oyunçuları var. Amma onlar sabit oyun sərgiləyə bilmirlər, tez-tez xal itirirlər. Gəncəlilər də qeyri-sabitlikdən qaçmağa çalışırlar. Ona görə də proqnozum heç-heçədi.
