“Əsas hədəfimiz ölkə kubokunu qazanmaqdı”

Premyer Liqanın 28-ci turunun qəhrəmanlarından olan “Bakı”nın yarımmüdafiəçisi Deyvidas Çesnauski “Xəzər Lənkəran”la oyunda (4:1) het-trikə imza atmaqla özündən söz etdirdi. Litvalı yarımmüdafiəçi bu münasibətlə azerisport.az saytının suallarını cavablandırıb.

“Şübhəsiz ki, “Bakı” üçün bu oyun çox uğurlu alındı. Biz rəqib qapısından dörd qol keçirə və ümumiyyətlə inamlı oyun sərgiləyə bildik. Belə oyundan və nəticədən bütün komanda razıdı”.

 

Bu oyunda het-trikə imza atmasına toxunan futbolçu bunları dilə gətirib: “Görünür, bu, mənim günüm idi. Əlbəttə, buna görə çox şadam. Lakin əsas odu ki, bu qollarım komandaya lazımı qələbəni qazandırmış oldu”.

Çoxları “Bakı”nın bütün diqqətini kuboka yönəldib, çempionata güc qoymadığını düşünsə də, Çesnauski bu fikirlərlə razı deyil: “Biz hər bir oyuna qələbə üçün çıxırıq. Bu oyunda da gördüyünüz kimi, inamlı qələbə qazandıq. İndi isə növbəti oyunumuza hazırlaşmaq zamanıdı. “Qarabağ”la Azərbaycan kubokunun yarımfinal oyunları çox çətin keçəcək. Özü də bu oyunlar həftəiçi baş tutacaq və qısa zaman ərzində də bu qədər matça çıxmaq asan deyil. İstənilən halda bizim əsas hədəfimiz ölkə kubokunu qazanmaqdı. Əlbəttə, çempionatda da dördüncü yeri tutmaq şansımız yaxşılaşdı. Amma əsas diqqətimiz kubokadı. “Qarabağ”la oyunlara ciddi hazırlaşmaq lazımdı. Bu mövsüm biz onları məğlub edə bilməmişik. Amma bu dəfə vəziyyəti xeyrimizə dəyişmək istəyirik”.