19 aprel 2012 16:12
Qəbələ Şaxtyordan futbolçu alır
“Qəbələ” – “Şaxtyor” əməkdaşlığı çərçivəsində növbəti addım atılıb. Azerisport.az xəbər verir ki, klubun baş meneceri Zaur Əzizov, əsas komandanın məşqçisi İbrahim Bakır və seleksiyaçı İsmayıl Əliyev klublar arasında imzalanan protokola əsasən Donetskdə ikigünlük səfərdə olublar.
Səfərlə bağlı açıqlama verən Zaur Əzizov “Şaxtyor”un əsas və əvəzidici komandalarının oyunlarını izlədiklərini bildirib: “Şaxtyor” klubu əsas komandanın və əvəzedici heyətin “Zorya” ilə qarşılaşmalarını izləmək üçün bizi Ukraynaya dəvət etmişdi. Bildiyiniz kimi “Şaxtyor” Futbol Akademiyasının yetirmələri hazırda Ukrayna Premyer Liqasının müxtəlif klublarında icarə əsasında top qovurlar. “Şaxtyor” klubunun nümayəndələri bu futbolçuların çıxışını diqqət mərkəzində saxlamağımızı istədi. Eyni zamanda əvəzedici heyətdə gənc və perspektivli futbolçuların komandamıza cəlb olunması ilə bağlı müzakirələr baş tutdu. Komandamızın məşqçisi İbrahim Bakır və seleksiyaçı İsmayıl Əliyevlə bərabər adıçəkilən matçları izlədik”.
Klub rəsmisi bir neçə futbolçunun diqqətlərini çəkdiyini deyib: “Matçlardan sonra elə Donetskdə məşqçilərimizin iştirakı ilə kiçik toplantı keçirdik. Həm İbrahim Bakır, həm də İsmayıl Əliyev əvəzedici heyətdə çıxış edən gənclərin komandamıza cəlb oluna biləcəyini bildirdi. Təbii ki, bir oyunla yekun qərar vermək olmaz. Həmin gənc futbolçuların durumu ilə bağlı “Şaxtyor” nümayəndələri ilə görüşümüz olacaq. Əgər onların komandamıza gəlişi ilə bağlı hər iki klub ilkin razılıq əldə etsə, o zaman məşqçilərimiz futbolçuları ən az daha bir dəfə meydançada izləyəcək, eyni zamanda mövsüm ərzində keçirilən oyunların videoyazısına baxacaq və sonda yekun qərar veriləcək”.
“Şaxtyor”la əməkdaşlığın miqyasının zaman keçdikcə daha da genişlənməkdə olduğunu bildirən Əzizov bəzi mövzularda Ukrayna təmsilçisi ilə məsləhətləşmələr apardıqlarını vurğulayıb: “Ümumiyyətlə hazırda klublararası münasibət çox yüksək səviyyədədi və istər əsas və əvəzedici komanda çərçivəsində, istərsə də akademiya məsələləri ilə bağlı daim qarşılıqlı müzakirələrimiz olur. Səfərimiz zamanı da bizə lazımi köməyi göstərdilər. Tək qarşılıqlı işlərimizlə bağlı deyil, ümumilikdə hazırkı və gələcək planlarımızı da onlarla bölüşürük. Təbii ki, işlərimizi möhkəm qurmaq üçün bizim hazırda görməkdə olduğumuz işləri yekunlaşdırmış təcrübəli klub kimi “Şaxtyor”dan məsləhətlər alırıq”.
