20 aprel 2012 14:03
Dünyanın ən varlı futbolçuları açıqlandı
“Forbes” jurnalı 2011-ci ilin yekunlarına əsasən, dünyanın ən yüksək ödənişli futbolçularının reytinqini açıqlayıb. Azerisport.az xəbər verir ki, siyahıda birinci pilləni ABŞ-ın “Los Angeles Galaxy” klubunun yarımmüdafiəçisi Devid Bekhem tutur.
İngiltərəli oyunçu hesabat dövründə 47 milyon dollar qazanıb. Bunun 37 milyon dollarını reklam və sponsor gəlirləri tutub.
İspaniya “Real”ının hücumçusu Kristiano Ronaldo 42 milyon dollar gəlirlə ikincidi. Qazancın təqribən yarısı sponsor müqavilələrindəndi. İlk “3-lüy”ü “Barcelona”nın futbolçusu və “Qızıl top”un sahibi Lionel Messi tamamlayır. Argentinalı hücumçu ötən il 39 milyon dollar qazanıb ki, bunun da 19 milyon dolları sponsorlardandı. İngiltərənin “Manchester United” klubunun forvardı Ueyn Runi (24 milyon dollar) 4-cü, “Real”ın yarımmüdafiəçisi Kaka (21 milyon dollar) 5-cidi.
Qeyd edək ki, bir müddət öncə “France Football” nəşri Lionel Messini dünyanın ən bahalı futbolçusu adlandırıb. Kristiano Ronaldo isə 3-cü olub.
