20 aprel 2012 17:18
18-ci duelə doğru
Premyer Liqanın XXIX turunda “Qəbələ” “İnter”lə qarşılaşacaq. Azerisport.az xəbər verir ki, aprelin 22-dəki görüş rəqiblərin tarixində 18-ci dueli olacaq.
İndiyədək komandalar 17 dəfə üz-üzə gəliblər. Bunların 15-i çempionat, 2-si kubokda gerçəkləşib.
Rəqiblərin duellərində hələlik üstünlük paytaxt təmsilçisinin tərəfindədir. Bakılılar 8 dəfə qalib gəlibsə, Qəbələ təmsilçisi 3 dəfə sevinən tərəf olub. Komandalar 6 dəfə meydanı “sülh”lə tərk edib. Bu qarşılaşmalardakı top fərqi də “İnter”in tərəfindədir – 26:12.
Tərəflərin 1 dəfə kubokda üz-üzə gəlib 2 oyunda münasibətlərini ayırd etdiyini nəzərə alsaq 17 matçdan 15 çempionat matçında “Qəbələ” 2, “İnter” isə 7 qələbə qazanıb və 6 dəfə bərabərlik qeydə alınıb. Çempionatda rəqib qapısına 21 top vuran bakılılar 10 dəfə qapısında qol görüb. Bütün qələbələrini öz meydanında qazanan “Qəbələ” paytaxtda səfər sindromunu qırmaq, ilk qələbəsini qazanmaq niyyətindədir. Belə ki, “İnter”in meydanındakı 8 görüşdə 5 dəfə meydan sahibləri qələbə qazanıb və 3 heç-heçə qeydə alınıb. Paytaxtdakı oyunlarda meydan sahibləri 20, qonaqlar isə 5 qol vurub.
“Qəbələ” və “İnter” arasında baş tutan son 4 oyunda bakılılar qələbəyə həsrətdir. 2010-cu ilin sentyabrındakı görüşdən sonra baş tutan 4 qarşılaşmada 1 dəfə qalib müəyyənləşib ki, bu da “Qəbələ” olub. Digər 3 matçda isə tərəflər hərəyə 1 xal əldə ediblər.
