21 aprel 2012 16:42
Millimiz Qazaxıstanı məğlub edib, üçüncü oldu (YENİLƏNİB)
Bu gün futbol üzrə 17 yaşadək qızlardan ibarət komandalar arasında UEFA tərəfindən Gürcüstanın paytaxtı Tiflisdə təşkil olunmuş beynəlxalq turnirə yekun vurulub. Azerisport.az xəbər verir ki, yarışda qüvvəsini sınayan Azərbaycan yığması 3-cü yer uğrunda oyunda Qazaxıstan yığması ilə qarşılaşıb.
Görüş komandamızın qələbəsiylə başa çatıb. Beləcə, millimiz beynəlxalq turniri üçüncü pillədə başa vurub.
Qeyd edək ki, Qazaxıstan yığması turnirdə keçirdiyi ilk oyunda gürcüstanlı həmyaşıdlarına 0:2 hesabı ilə məğlub olub. Millimiz isə Türkiyəyə uduzmuşdu – 1:3.
Beynəlxalq turnir
3-cü yer uğrunda oyun
21 aprel
Azərbaycan – Qazaxıstan - 2:0 (1:0)
Qollar: S.Qurbanova, 32, A.Vəliyeva, 43.
Oyun başladı
32. Sevinc Qurbanova komanda yoldaşının əla ötürməsini qapının uzaq küncünə ünvanlayaraq hesabı açır - 1:0
Birinci hissə başa çatdı
İkinci hissə başladı
41. Sissi Rayt ikinci hissənin əvvəlində Aliyə Vəliyeva və Nigar Cəlillini meydana buraxır
43. Bu dəyişiklik özünü dərhal doğruldur: Nigarın zərbəsini qapıçı dəf etsə də, Aliyə təkrar zərbə ilə komandamızın üstünlüyünü artırır - 2:0
Matç başa çatdı
