22 aprel 2012 20:50
Böyük oyun yenə qalmaqalsız ötüşmədi
Futbol üzrə Azərbaycan Premyer Liqasının 29-cu turunun “Xəzər Lənkəran” – “Neftçi” oyunu zamanı qalmaqal yaranıb. Azerisport.az xəbər verir ki, görüşün 75-ci dəqiqəsində cənublu fanatlar fişənglər yandıraraq, atəşfəşanlığa başlayıblar.
Onların bu hərəkəti qonaq komandanın tərəfdarlarının xoşuna gəlməyib. Çünki adətən “ağ-qaralı” fanatlar “Neftçi”nin hər oyununun 75-ci dəqiqəsində oxşar addımı atırdılar. Bunun səbəbi isə paytaxt klubunun bu il 75 illik yubileyini qeyd etməsiylə bağlıdı.
Məhz bu olay nəticəsində bakılı azarkeşlər əks tribunalara oturacaqları və digər yad əşyaları atmağa başlayıblar. Onların bu hərəkətinə müdaxilə etmək üçün hərbçilər və polislər işə girişiblər. Nəticədə azarkeşlərlə asayiş keşikçiləri arasında dava düşüb. Bəzi fanatlar polislər tərəfindən həbs edilib. Bir neçə fanat isə ciddi xəsarətlər aldığı üçün dərhal təcili tibbi yardım maşınlarıyla xəstəxanaya götürülüblər.
