24 aprel 2012 00:12
“Qızıl medalı kimin qazanacağı artıq məlumdu”
Azerisport.az sizi “İnter”in yarımmüdafiəçisi Asif Məmmədovun müsahibəsi ilə tanış edir.
- “Qəbələ”yə qarşı keçirilən qarşılaşma öz gərginliyi ilə seçildi. Matç çox çətin keçsə də, sonradan “İnter” əzmkar qələbə qazana bildi. Baş tutan görüş barədə nə deyə bilərsən?
- Bu oyun bizim üçün çox önəmli idi. Qarşılaşma hər iki tərəf üçün böyük əhəmiyyət daşıyırdı. Məqsədimiz qələbə qazanmaq idi ki, buna da nail ola bildik. Avropakuboklara vəsiqə yolunda bu üç xal bizə çox lazım idi.
- Bu turda “Qarabağ”ın məğlub olması da “İnter”in işinə yaradı. Belə ki, komanda Ağdam klubunu keçməklə turnir cədvəlinin 2-ci pilləsinə yüksəldi.
- Fikrimcə, birinci pilləni kimin tutacağı artıq məlum məsələdi. Biz də öz növbəsində qalan görüşlərdə qələbə qazanıb 2-ci yeri özümüzdə saxlamağa çalışacağıq. İnşallah, sonda məqsədlərimizə çatacağıq.
- Yeri gəlmişkən, çempionat çərçivəsində keçirilən son 5 matçda “İnter” qələbəyə həsrət idi. Amma dünən qələbə əldə etməklə komanda bu uğursuz seriyanı dayandırmağı bacardı.
- Mövsümboyu hər komanda bu cür vəziyyətlə üzləşir. Belə enişlərin olması qaçılmazdı. Biz də belə hadısəylə üzləşdik, amma zənnimcə, “Qarabağ” klubuna qarşı keçirilən qarşılaşmada biz bu seriyaya artıq son qoya bilmişik. “Qəbələ”ylə oyundakı qələbəmizi isə buna sübut kimi göstərə bilərik.
- “İnter”in əsas məqsədlərindən biri Avroliqaya vəsiqə əldə etməkdi. Necə düşünürsən, “İnter” bu hədəfə çata biləcək gücdədi?
- İnşallah biz bunu edə biləcəyik. Bunun üçün isə mövsümün qalan qarşılaşmalarında yaxşı oyun göstərmək və tam gücümüzlə mübarizə aparmaq lazımdı.
- Artıq çərşəmbə günü komandanı Azərbaycan Kubokunun 1/2 final mərhələsi çərçivəsində “Neftçi”ylə çətin səfər qarşılaşması gözləyir. Baş tutacaq bu görüş haqqında nə deyə bilərsən?
- Bu oyun bizim üçün çox vacibdi. Məqsədimiz kubokun finalına çıxmaqdı, lakin biz bilirik ki, bunu etmək çox çətin olacaq. Komandamızı gərgin mübarizə gözləyir. (klub saytı)
