24 aprel 2012 17:55
Futbolumuzda irqçilik qalmaqalı
“Bakı”nın yarımmüdafiəçisi İbrahim Karqbo Azərbaycan futbolunda ən səs-küylü qalmaqallardan birinin müəllifi ola bilər. Azerisport.az xəbər verir ki, sözügedən futbolçu müsahibələrinin birində “Qarabağ”ın hücumçusu Rauf Əliyevlə “Neftçi”nin forvardı Bahodir Nasimovun onun ünvanına irqçi sözlər səsləndirdiyini bəyan edib.
Maraq üçün qeyd edək ki, sabah “Bakı” ilə “Qarabağ” futbol üzrə Azərbaycan kubokunun yarımfinal mərhələsinin cavab oyununa çıxacaq. Odu ki, sözügedən qalmaqalın ortaya atılması sabah baş tutacaq prinsipial görüş öncəsi gərginliyi bir qədər də artırıb.
Lakin Rauf Əliyev haqqında deyilənlərlə razılaşmır. O, saytımıza müsahibəsində bunları dilə gətirib: “Bütün bunlar təxribatdı. Oyun vaxtı çox şey olur: sərt mübarizə, narazılıq, söz deyişməsi. Amma mən heç kimə dərisinin rənginə görə fərq qoymamışam. Karqbo bunu özündən uydurub. Ümumiyyətlə, irqçiliyin futbolda əleyhinəyəm. Bu, heç kimə xoş deyil. Bu futbolçuya görə təəssüflənirəm. Çox təəssüf ki, o, diqqətləri özünə çəkmək üçün məhz bu yolu seçib”.
“Bakı”nın idman direktoru Yaşar Seyidovun da məsələ ilə bağlı öz fikirləri var: “Futbol meydanında elə gərgin mübarizə və mübahisə gedir ki, hərdən emosiyalar həddini aşır. Futbolçuların orda bir-birinə nə dediklərini bilmirəm. Amma görünür “Qarabağ”ın rəhbərliyi ilə söhbət etməliyik ki, gələcək oyunlarda oxşar hallar təkrarlanmasın. Etiraf edim ki, mən Azərbaycanda irqçilik problemi ilə üzləşəcəyimizə inanmıram”.
“Bakı”nın baş məşqçisi Novruz Əzimovun məsələyə münasibəti isə belədi: “Qarşıda bizi “Qarabağ”la çətin kubok oyunu gözləyir. Ona görə bu məsələ məni çox narahat edir. Nasimov artıq iki ildir Azərbaycanda çıxış edir. İndiyə qədər pis heç nə etməyib. O, Premyer Liqanın ən yaxşılarındandı. Nasimov da müsəlmandı və onun irqçiliyə yol verməsi qəribə görünür. İnanmraım ki, Rauf Əliyev də belə bir şeyə yol verə. Əks halda futbolçu bunu oyundan dərhal sonra deyərdi”.
