Vladimir Levin: Qol vursaq, hər şey yaxşı olacaq

“İnter”in müdafiəçisi Vladimir Levin futbol üzrə ölkə kubokunun ikinci yarımfinal görüşü çərçivəsində “Neftçi”yə qarşı keçiriləcək oyun barədə (ilk oyun: 0:0) fikirlərini azerisport.az-a açıqlayıb.

 

“Adi qaydada hazırlaşırıq. Prinsipcə sabah bizi nə gözlədiyini bilirik. Bu, finala vəsiqənin sahibini müəyyən edəcək həlledici oyun olacaq. Sabah finala çıxmağa çalışacağıq”, deyə Levin bildirib.

 

Levinin sözlərinə görə onları məhsuldar heç-heçə də təmin edir: “Bəli, əlbəttə ki qol vurmaq yaxşı olardı. Hər halda qol vurmaqla yanaşı qol buraxmamaq da lazımdır. Qol vursaq, hər şey yaxşı olacaq”.

 

Çempionatın 29-cu turunda “İnter” Bakıda “Qəbələ”ni 2:1 hesabı ilə məğlub edərək çoxdan gözlənilən qələbə qazandı. Levin bu qələbənin komanda ruhuna çox yaxşı təsir etdiyini bildirib: “Əlbəttə, biz uzun müddət idi ki, qələbə qazana bilmirdik.  Son dəfə ölkə kubokunun 1/4 finalında “Xəzər-Lənkəran”ı məğlub etmişdik”.

 

“İnter”in kapitanı ötən mövsüm ölkə kubokunun finalındakı məğlubiyyəti xatırlayaraq bildirib: “Final mövsümün son oyunu olacaq. Ötən mövsüm finalda birinci hissəni boşa verərək elə də uğurla oynamadıq. İndi isə finala çıxmaq və Kuboku qazanmaq istəyirik”.

 

“Neftçi”nin ötən tur “Xəzər-Lənkəran”a məğlub olmaqla (0:1) çempionluğu rəsmiləşdirə bilməməsinə toxunan Levin, bunları bildirib: “düzünü desəm, rəqibin hansı ovqatda meydana çıxacağını bilirəm. Ancaq “Neftçi” təcrübəli komandadı. Onlar kubok oyununa lazımı qaydada hazırlaşıb mübarizəyə köklənə biləcəklər. Düşünürəm ki, bu məğlubiyyət “neftçilər”in sabahkı oyununa təsir etməyəcək. Onlar da bizim kimi qələbəyə oynayacaqlar”.