26 aprel 2012 16:56
Xəzər Lənkəran: 6 xalın bərpası AFFA-nın yox, öz əməyimizin bəhrəsidi
Artıq xəbər verdiyimiz kimi, FİFA İntizam Komitəsi Azərbaycan Futbol Federasiyaları Assosiasiyası və “Xəzər Lənkəran” Futbol Klubuna ünvanladığı məktubda bir müddət öncə bu klubun hesabından altı xalın silinməsi barədə qurumun çıxardığı qərarın yanlış olduğunu bildirib və ölkə futbol federasiyasından silinmiş altı xalı bərpa etməyi tələb edib. Azerisport.az xəbər verir ki, FİFA tərəfindən bu məsələyə yenidən baxılması “Xəzər Lənkəran” FK-nun İdman Arbirtraj Məhkəməsinə verdiyi apellyasiya şikayətinin nəticəsi olaraq baş tutdu.
Belə ki, klub tərəfindən 13 və 19 aprel tarixlərində İAM-nə göndərilən məktublarda borcun qalıq hissəsinin müəyyən olunmuş vaxt limiti çərçivəsində ödənildiyi göstərilmişdi. 24 aprel 2012-ci il tarixdə İdman Arbitraj Məhkəməsindən “Xəzər Lənkəran”a gələn məktubda klubun apelyasiya şikayətinin faktlar və qoşma sənədlərlə birlikdə FİFA-ya göndərildiyi də bildirilmişdi.
Yayılan bəzi məlumatlarda FİFA-nın məsələyə yenidən baxması AFFA tərəfindən onlara müraciətin edilməsinin nəticəsi kimi qələmə verilir. Lakin bu məktubun mətnindən də görünür ki, 18 aprel 2012-ci il tarixdə AFFA FİFA-ya yalnız xalların çıxılmasının icra edilməsi ilə bağlı məlumat göndərib. FİFA isə məktubda buna cavab olaraq yeni faktların aşkar olunduğunu bildirir. Bir daha qeyd edirik ki, “Xəzər Lənkəran”ın silinmiş xallarının bərpası məhz klubun başda klub prezidenti olmaqla əməkdaşlarının səyləri sayəsində bu istiqamətdə aparılan tədbirlərinin nəticəsi olaraq mümkün oldu. Aidiyyatı qurumlar isə bu məsələnin müsbət həlli baxımından hər hansı bir uğurlu addım atmağa nail olmamışdılar. (klub saytı)
