26 aprel 2012 12:00
XL qayıtdı, Qarabağ avrokuboklarsız qala bilər
FIFA-nın “Xəzər Lənkəran”a qarşı cəza tədbiri kimi 6 xallıq cərimə barədə qərarının ləğvi və sözügedən xalların bərpasından sonra Premyer Liqanın turnir cədvəlində dəyişikliklər qaçılmazdı. Azerisport.az xəbər verir ki, bu dəyişiklik ilk növbədə “Qarabağ”a təsirsiz ötüşməyə bilməz.
Ağdam klubu son üç mövsümdə ilk dəfə olaraq avrokuboklarsız qala bilər. Əgər Premyer Liqa təmsilçiləri çempionatı turnir cədvəlinin hazırkı sıralaması ilə başa vursalar, qitə miqyasında ən uğurlu təmsilçimiz “Qarabağ” avrokuboklardan kənarda qalacaq. Hazırda “Qarabağ” dördüncü pillədə qərarlaşıb və beşinci pillədə qərarlaşmış “Bakı”nın ölkə kubokunun finalına vəsiqə qazanmasından sonra bu pillə artıq avrokuboklara vəsiqəni təmin etmir. “Qarabağ”ın çempionluq şansları da yoxdu. Bu isə avrokuboklara düşmək üçün komandanın mütləq “gümüş” və “bürünc” verən yerlərdən birinə yiyələnməyə borclu olması deməkdi. Ancaq bu halda Ağdam təmsilçisi qitə turnirinə vəsiqə qazana bilər.
Xatırladaq ki, ölkə kubokunun finalında “Neftçi” və “Bakı” qarşılaşacaq. Əgər “Neftçi” ölkə çempionu titulunu qorusa, Çempionlar Liqasında iştirakını təmin edəcək. “Bakı” isə ölkə kubokunun finalındakı nəticədən asılı olmayaraq Avropa Liqasına yollanacaq. Həmçinin çempionatda ikinci və üçüncü yerlərin sahibləri də Avropa Liqasında oynamaq imkanı qazanacaq. Dördüncü pillənin Avropa Liqasına vəsiqə verməsi yalnız növbəti halda baş verə bilər: “Neftçi” çempionluğu “Xəzər Lənkəran” və ya “İnter”ə uduzmalı (Böyükağa Hacıyevin yetirmələrindən başqa nəzəri cəhətdən yalnız bu komandalar çempion ola bilər) və ölkə kubokunun finalında “Bakı”ya qalib gəlməlidi. Belə olan halda “Qarabağ” dördüncü pillədən Avropa Liqasına vəsiqə əldə edə bilər.
Ancaq bunun üçün dördüncü pilləni də qazanmaq lazımdı. Hazırda mənəvi yüksəlişdə olan “Bakı” hətta medallar uğrunda mübarizəyə girişib. “Bakı”ı ilə üçüncü yer arasında 5 xallıq fərqin aradan qaldırılması şəxsi görüşlərin keçiriləcəyini nəzərə alsaq, mümkünsüz görünmür. Ağdamlıların bütün mübarizəsi irəlidədi. Növbəti turda isə “Qarabağ” “Neftçi” ilə üz-üzə gələcək. “İnter” “Xəzər Lənkəran”ı qəbul edəcək. “Bakı” isə “Qəbələ”nin qonağı olacaq.
