27 aprel 2012 14:14
Məşqçilərimiz üçün lisenziya həsrəti başa çatır
On azərbaycanlı futbol məşqçisi İsveçrə səfərini başa vuraraq, vətənə qayıdıb. Azerisport.az xəbər verir ki, həmin mütəxəssislər PRO kateqoriyalı məşqçi kursları çərçivəsində sözügedən ölkədə imtahan veriblər.
Bu kurslarda iştirak edən mütəxəssislərimizin demək olar ki, hamısı UEFA-nın mənzil qərargahında olub. Yalnız “Qarabağ”ın baş məşqçisi Qurban Qurbanov komandasını tək qoymaq istəmədiyi üçün sözügedən səfərə yollanmayıb.
Azərbaycan millisinin sabiq baş məşqçisi Şahin Diniyev UEFA-ya səfərdən danışarkən, bunları dilə gətirib: “Hər şey yüksək səviyyədə keçdi. Dünya şöhrətli mütəxəssislər bizə mühzairə oxudular. Düzünü deyim ki, bu dörd günün necə keçdiyini özümüz də bilmədik. Ora səhər tezdən gedib, axşam doqquzda çıxırdıq. Əminəm ki, bu seminarlar məşqçilərimiz üçün çox faydalı olacaq”.
Şahin Diniyevlə yanaşı bu seminarlarda Vəli Qasımov, Arif Əsədov, Nazim Süleymanov, Təbriz Həsənov, Yaşar Vahabzadə və başqaları da olub. Onlar bu seminarlarda dünya futbolunun bir sıra tanınmış isimləri ilə birgə iştirak ediblər. Məsələn, Fransa yığması ilə dünya və Avropa çempionu olmuş Marsel Desayi, Almaniya yığmasının sabiq qapıçısı Yens Lemann, Almaniya millisinin sabiq yarımmüdafiəçisi Ditmar Hamann, Rusiya yığmasının sabiq hücumçusu Nikolay Pisarev və başqaları. Seminarda estoniyalı mütəxəssislər də olublar. Bütövlükdə, 80 nəfərdən çox məşqçi PRO kateqoriyası almaq üçün UEFA-nın bu seminarına qatılıb.
Diniyevin sözlərinə görə, hələ imtahanların nəticələri məlum deyil: “Nəticələri gələn həftə biləcəyik. Məhz o vaxt biləcəyik ki, biz lisenziya almağı bacaracağıq, ya yox”.
Qeyd edək ki, PRO kateqoriyasına malik məşqçi dünyanın istənilən klubunda işləmək hüququ qazanır. Lakin əksəri işsiz olan bizim məşqçilərin özlərinə yeni klub tapıb-tapmayacağı sual doğurur.
