1 may 2012 15:23
Əliyev üçün mövsüm bitdi
Xəbər verdiyimiz kimi, bu gün AFFA İntizam Komitəsinin növbəti iclası keçirilib. Azerisport.az xəbər verir ki, komitə üzvləri birinci divizionun 17-ci turundan təxirə salınmış və 18-ci turunun oyunlarında qeydə alınan qayda pozuntularına da hüquqi qiymət veriblər.
17-ci turun təxirə salınmış “Şəmkir” – “Bakılı” matçının 78-ci dəqiqəsində “Bakılı”nın futbolçusu Turan Əliyev, 81-ci dəqiqəsində isə “Şəmkir”in oyunçusu Şöhrət Nəsibov idmançıya yaraşmayan hərəkətə görə ikinci sarı vərəqəni alıb. Hər iki futbolçu 1 oyunluq cəzalandırılıb, klubları 100 manat cərimə olunub. “Şəmkir” həmçinin 5 futbolçusu sarı vərəqə aldığından 100 manat cərimələnib.
18-ci turun “Neftçala” – “MKT-Araz” matçının 42-ci dəqiqəsində “Neftçala”nın futbolçusu Qeyrət Əliyev kobud oyuna görə birbaşa qırmızı vərəqə alıb. Futbolçu 2 oyunluq cəzalandırılıb, klubu 200 manat cərimə edilib. Mövsümün sonuna iki tur qaldığından onun üçün mövsüm başa çatıb.
“Lokomotiv”in 5, MOİK-in isə 4 futbolçusu sarı vərəqə aldığından klublar 100 manat cərimə edilib.
