1 may 2012 17:57
Qəbələ daha yeddi futbolçusunu yola salır
“Qəbələ” mövsümlərarası fasilədə heyətində bir sıra islahatlar həyata keçirməyə hazırlaşır. Azerisport.az xəbər verir ki, klub rəhbərliyi bəzi yerli və əcnəbi futbolçularla yollarını ayırmağa hazırlaşır.
Belə ki, bölgə təmsilçisi yerli oyunçulardan müdafiəçi Saşa Yunisoğlu və Arif İsayevi heyətində saxlamaqda maraqlı deyil. Hansı ki, bu futbolçular başa çatmaqda olan mövsümdə əsas heyətə düşməkdə çətinlik çəkirdilər. Onların müqaviləsinin müddəti iyunda başa çatacaq və güman ki, tərəflər yeni anlaşma imzalamayacaq. İsayev və Yunisoğlu ilə yanaşı Nodar Məmmədovun da müqaviləsinin yenilənməsi hələlik sual altındadı.
Əcnəbi futbolçulara gəlincə, Deon Barton, Abdulkader Kamara, Qrem Smitin taleyi sual altındadı. Eyni zamanda Sergey Sokolov da “Qəbələ”dəki çıxışını başa vura bilər.
Maraq üçün xatırladaq ki, Fatih Kavlak hələ mövsüm başa çatmasa da, bir neçə oyunçunu komandasından uzaqlaşdırılıb. Öncə serbiyalı yarımmüdafiəçi Veselko Trivunoviçi heyətdən kənarlaşdıran türkiyəli mütəxəssis son olaraq da Lyuba Baranin və qapıçı Pavel Doroşevin “Qəbələ”dəki çıxışına son qoydu. Lakin son iki futbolçunun bölgə klubundan gedişinə onların zəif çıxışı yox, intizamsızlıqları səbəb oldu.
