2 may 2012 14:54
Millimiz Qazaxıstana penaltilərlə məğlub oldu (YENİLƏNİB)
17 yaşadək futbolçulardan ibarət Azərbaycan yığması bu gün Qazaxıstanın Almata şəhərində təşkil olunan “Prezident kuboku” turnirində son oyununa çıxıb. Azerisport.az xəbər verir ki, yığmamız turnirin bürünc medallarını qazanmağa çalışıb.
Təbriz Həsənovun komandasının bu dəfəki rəqibi meydan sahibi - Qazaxıstan yığmasıydı. Bu beynəlxalq turnirin son qalibi olan millimiz bu dəfə maksimum üçüncü yeri tutmaq şansına malik idi. Lakin təəssüf ki, komandamız bu dəfə mükafatçılar sırasına düşə bilməyib. Qarşılaşmada hesabı penalti zərbəsi ilə Qazaxıstan yığması açıb. Fəhmin Muradbəylinin cavab qolu hesabda tarazlıq yaradıb. Oyun bu hesabla başa çatdığı üçün qalib penalti seriyasında müəyyənləşib. Mahir Mədətov, Ülvi Süleymanov, İlyas Səfərzadə və Mənsur Nəhavəndi zərbələri dəqiq yerinə yetirsə də, Elnur Cəfərov penaltini sərrast vura bilməyib. Beləliklə, yığmamız penalti seriyasında 4:5 hesabı ilə məğlub olub.
Xatırladaq ki, yığmamız qrup mərhələsində Gürcüstan (1:0) və Türkiyə (2:0) ilə oyunlarda qələbə qazansa da, bunun davamını İranla oyunda (0:3) gətirə bilməmişdi və qrup ikincisi kimi üçüncü yer uğrunda mübarizə aparmalı olmuşdu.
Bu gün baş tutan 7-ci yer uğrunda oyunda Gürcüstan Türkmənistanı 2:0 hesabıyla məğlub edib. Türkiyə isə 5-ci yer uğrunda keçirilən oyunda Ermənistanı üstələyib (1:1, penaltilərlə - 5:4). Turrnirin finalında isə İranla Macarıstan qarşılaşacaq.
Prezident kuboku
3-cü yer uğrunda oyun
Qazaxıstan - Azərbaycan - 1:1 (penaltilərlə 5:4)
50-ci dəqiqədə qazaxlar penaltini dəqiq yerinə yetirərək hesabı açırlar - 1:0
59-cu dəqiqədə yığmamız buraxlan qolun əvəzini çıxmağı bacarır - 1:1
Matçın əsas vaxtı heç-heçə bitdiyindən qalibi penaltilər müəyyənləşdirəcək
11 metrlik zərbələrdə daha dəqiq olan qazaxlar bürünc medallara sahib çıxırlar - 5:4
