3 may 2012 13:46
Amerikalı mütəxəssis Azərbaycan yığmasında!
AÇ-2013-ün seçmə mərhələsi ərəfəsində basketbol üzrə Azərbaycan yığmasına yeni məşqçi təyin olunub. Azerisport.az xəbər verir ki, Azərbaycan Basketbol Federasiyası ABŞ-dan olan mütəxəssis Ali Tonu millimizə cəlb edib.
O, yığmamızın baş məşqçisi Elxan Əliyevə kömək edəcək.
Qeyd edək ki, Tonun son iş yeri Kaliforniyanın “UC Irvine” klubu olub. O, məşqçiliyə qədər həm də gözəl karyeraya malik olub. Belə ki, Ton hətta 1995-ci ildə Sanset Liqada ən faydalı oyunçu adını qazanıb. Yeri gəlmişkən, keçmiş basketbolçu karyerasının son illərini Türkiyənin “Galatasray” klubunda keçirib.
1999-cu ildən etibarən isə Ton məşqçilik karyerasına başlayıb. ABŞ-da müxtəlif klublarda çalışdıqdan sonra bu mütəxəssis 2005-ci ildə Türkiyənin gənclərdən ibarət yığmasının baş məşqçi köməkçisi kimi fəaliyyətə başlayıb. Son illərdə isə o, əsasən Qərbi Kaliforniyada öz həyat yoldaşı Elizabet və qızı Leyla ilə birgə yaşayırdı.
