“Qarabağ Avroliqaya getmək istəyirsə, bizi məğlub etsin”

“İnter”in hücumçusu Girt Karlson Premyer Liqanın 31-ci turunun “Qarabağ”la oyunu öncəsi azerisport.az saytının suallarını cavablandırıb.

 

- Komandanız “Qarabağ”la oyuna hazırdı?
- Bəli. Bütün həftəni bu həlledici oyuna hazırlaşmağa həsr etmişik. Demək olar ki, artıq oyuna hazırıq.

 

- Nə dərəcədə yaxşı?
- Çox yaxşı. Maksimum nəticəyə nail ola biləcək qədər.

 

- Quzanlıda qələbə qazanmaq istəyirsiz?
- Biz buna Lənkəranda nail olmuşuq. Niyə eyni uğuru Quzanlıda da qazanmayaq?
 

- Siz o qədər əmin danışırsız ki, sanki rəqibiniz çox zəifdi...

- Xeyr. Düzdü, “Qarabağ” son dövrlər inamlı təsir bağışlamır. Amma hər bir komandada eniş dövrü olur. Bu, o demək deyil ki, bizə onlarla qarşılaşmada asan olacaq. Ən azından ona görə ki, ağdamlılar da Avropa Liqasına vəsiqə qazanmaq istəyirlər.

 

- Rəqibi daha çox hansı cəhətinə görə təhlükəli hesab edirsiz?
- “Qarabağ” bir çox cəhətlərinə görə təhlükəli rəqibdi. Onların ən təhlükəli cəhəti kombinasiyalı hücumlarıdı. Onlar rəqibin cərimə meydançasına asanlıqla daxil olub, təhlükəli vəziyyət yarada bilirlər.

 

- Siz qələbədən dəm vursanız da, hətta heç-heçə də “İnter”i qane edir...

- Düzdü. Amma buna görə 90 dəqiqə qapımızın qarşısında oturmağa hazırlaşmırıq. Belə oynasaq, heç nəyə nail ola bilmərik. Lakin təbii ki, qarşılaşma heç-heçə bitsə, bu, bizim üçün pis nəticə sayılmamalıdı.

 

- Komandanızın Avroliqiya neçənci yerlə getməsi sizin üçün vacibdi?
- Hansı pilləyə layiq olsaq, ordan da gedərdik. Əsas odu ki, avrokuboklara düşə bilək. Bu, əsas hədəfdi.

 

- Futbol ictimaiyyətində belə bir fikir var ki, Avropada heç bir uğuru olmayan “İnter”dənsə, son illər uğurlu çıxışı ilə diqqət çəkən “Qarabağ”ın Avropa Liqasına yollanması daha yaxşı olardı...

- Mən hesab edirəm ki, avrokuboklara buna daha çox layiq olan komanda yollanmalıdı. Əgər “Qarabağ” bizə qalib gəlsə, buyurub gedə bilərlər. Həmin yeri “İnter” tutacağı halda isə deməli biz buna layiqik.

 

- Bəs “İnter” avrokuboklarda “Qarabağ” kimi layiqli çıxış edə biləcəkmi?
- Püşkdən çox şey asılı olacaq. Əgər avrokuboklara vəsiqə qazansaq, əlimizdən gələni edəcəyik.