4 may 2012 12:48
Qarabağ İnterə qarşı: bakılılar bir addım öndə
Premyer Liqanın 31-ci turunun qarşıdan gələn “Qarabağ” - “İnter” görüşü hər iki komanda üçün sayca 27-cı olacaq. Azerisport.az xəbər verir ki, bunadək komandalar bir-biri ilə 26 dəfə qarşılaşıb.
21 oyun çempionat çərçivəsində keçirilib, 5 oyun isə kubok turnirinin payına düşür. “İnter” rəqibini 10 dəfə məğlub edə bilib, “Qarabağ” isə 9 dəfə. Qalan 7 matçda tərəflər meydandan sülhlə ayrılıblar. Vurulan topların fərqi bakılıların xeyrinədi - 21:20.
Komandalar ilk dəfə 2004-cü ilin noyabr ayında çempionat çərçivəsində üz-üzə gəliblər. Həmin görüş 3:1 hesabıyla ağdamlıların xeyrinə başa çatıb. “İnter” və “Qarabağ” qarşıdurmasında ilk qolun müəllifi ağdamlıların forvardı Vadim Vasilyev olub və o, bu qolu penalti zərbəsindən vurub.
Xatırlardaq ki, bu mövsümdə komandalar üç dəfə qarşılaşıb. İlk oyunda ağdamlılar 1:0 hesabıyla qalib gəliblər. İkinci qarşılaşma qolsuz bərabərliklə başa çatıb. Üçüncü oyunda da tərəflər meydandan sülhlə ayrılıblar -1:1.
“İnter” - “Qarabağ” oyunlarında ən populyar hesab 1:0-dı. Belə nəticə 26 oyundan 14-də qeydə alınıb. Maraqlıdı ki, qarşılaşmaların tarixində darmadağın qeydə alınmayıb, yalnız iki dəfə komandalara bir-birini 2 top fərqilə qalib gəlmək müyəssər olub.
Azərbaycan çempionatında “İnter”ə qarşı keçirilən ev oyunlarında “Qarabağ” üstünlüyə malikdi. Belə ki, 10 qarşılaşmada ağdamlılar 5 dəfə "İnter"i məğlub etməyi bacarıb. 3 oyun heç-heçə başa çatıb və 2 dəfə “İnter” qələbə qazanıb. Bu qarşılaşmalarda top fərqi “Qarabağ”ın xeyrinədi - 10-6.
Qeyd edək ki, “Qarabağ” - "İnter" matçı mayın 5-də keçiriləcək. Oyun saat 17:30-da başlayacaq.
