5 may 2012 11:35
Premyer Liqa, 31-ci tur: Vladislav Qədirovun proqnozu
“Rəvan”ın sabiq baş məşqçisi Vladislav Qədirov Premyer Liqanın 31-ci turunun oyunları ərəfəsində azerisport.az saytı üçün proqnozlarını açıqlayıb.
Xəzər Lənkəran – Qəbələ
Ağır oyun olacaq. Düzünü deyim ki, “Qəbələ” bu rəqibinə son oyunda uduzduğundan, onların Lənkərandakı oyuna daha güclü motivasiya ilə çıxacağını gözləyirəm. Buna görə də heç-heçəyə üstünlük verirəm.
Qarabağ – İnter
Burda çox şey həll olunacaq. “Qarabağ”ın avrokuboklara getmək yolunda son şansıdı. Şübhəsiz ki, çox çətin qarşılaşma olacaq. Amma heyətinə görə mən ağdamlıların qələbə qazanacağını düşünürəm.
Bakı – Neftçi
Hesab edirəm ki, “Neftçi” bu oyuna əsasən gənc futbolçularını buraxacaq. Komanda hədəfinə çatdığından son oyunlarda gənclərin özünü göstərməsinə, təcrübə toplamalarına şans yaradacaq. “Bakı”nın isə daha üst pillələrə çıxmaq üçün xala ehtiyacı var. Odu ki, “Bakı”nın qələbə qazanacağını düşünürəm.
Simurq – Rəvan
Bu da asan oyun olmayacaq. Amma heyətinə, sərgilədiyi oyununa görə “Rəvan”ın qələbə qazanacağını düşünürəm. Heç-heçə də mümkündü. 70 faiz “Rəvan”, 30 faiz “Simurq”un qələbə qazanmaq şansı var.
Kəpəz – Turan
Bu komandalar arasındakı qarşılaşmalar həmişə gərgin keçir. Amma mən hesab etmirəm ki, “Kəpəz” doğma meydanda məğlub olsun. Ona görə də üç xalın gəncəlilərə qismət olacağını düşünürəm.
Sumqayıt – AZAL
Bu oyuna da proqnoz vermək çox çətindi. Məncə ya heç-heçə olacaq, ya da “Sumqayıt” qələbə qazanacaq.
