7 may 2012 11:38
Admir Teli: Son həftələrdə çoxlu səhvlər buraxırıq
“Qarabağ”ın müdafiəçisi Admir Teli azerisport.az saytına müsahibəsində Premyer Liqanın 31-ci turu çərçivəsində keçirilən “İnter”lə oyundan (1:0), Avropa Liqasına vəsiqə qazanmaq şanslarından, eləcə də Rəşad Sadiqovun gedişindən danışıb.
“İnter”lə oyunda qələbə qazanmaq bizim üçün çox vacib idi. Çünki “Qarabağ” hazırda heç də yaxşı vəziyyətdə deyil. Amma bu görüşdə hər şeyi düz etməklə istədiyimizə nail ola bildik. Şadam ki, üç xalı qazanan tərəf məhz biz olduq. Amma bizim üçün hər şey həll olunmayıb. Qarşıda kifayət qədər ağır oyun var. Biz son 3-5 həftədə çoxlu səhvlər buraxırıq. Ümid edirəm ki, hər şeyə rəğmən Avropa Liqasına vəsiqə qazana biləcəyik”.
Qeyd edək ki, “Qarabağ” bu vəzifənin öhdəsindən gəlmək üçün “Xəzər Lənkəran”la səfər matçında mütləq qələbə qazanmalıdı. Telinin fikrincə Azərbaycanı Avropa Liqasında məhz Ağdam klubu təmsil etməlidi: “Avroliqaya düşmək üçün əlimizdən gələn hər şeyi edəcəyik. Fikrimcə, “Qarabağ” buna layiqdi. Biz son üç ildə ardıcıl olaraq Avroliqada ölkəni layiqincə təmsil edən yeganə komandayıq. Bu yöndə təcrübəmiz də digər klublardan daha çoxdu. Buna görə də hesab edirəm ki, “Qarabağ” mütləq Avroliqada çıxış etməlidi”.
Albaniya millisinin müdafiəçisi Lənkərandakı oyundan danışarkən bunları da bildirib: “Biz bilirik ki, “Xəzər Lənkəran”la səfər oyunları daha çətin olur. Lənkəran stadionundakı atmosfer həmişə fərqlənir. Komandanı minlərlə azarkeş dəstəkləyir. Amma bir məqam var ki, dolu tribunalar qarşısında oynamağı biz də xoşlayırıq. Odu ki, fikrimcə bizi çox maraqlı, gərgin və ağır oyun gözləyir”.
Rəşad Sadiqovun gedişinə münasibətini açıqlayan Admir bunları dilə gətirib: “Biz çox yaxşı futbolçunu itirdik. Amma futbolda həmişə belə şeylər olur. Futbolçu həmişə özü üçün yaxşı olanı seçir. Ona ancaq uğur arzulaya bilərəm. Məncə futbolçunu ən yaxşı elə həmkarları başa düşə bilər. Yenə deyirəm ki, Rəşad yaxşı oyunçu idi. Lakin ondan soruşa bilmərəm ki, komandadan niyə gedirsən. Bu, mənim işim deyil. Amma mənim əlimdə olsaydı, onu ən azı mövsümün sonuna kimi komandada saxlardım”.
