8 may 2012 15:00
“Vəzifəmiz sadədi - qalib gəlib, Avroliqaya vəsiqəni təmin edəcəyik”
“İnter”in seneqallı yarımmüdafiəçisi İbarhima Niasse müsahibəsində Premyer Liqanın son turunun “Qarabağ”la baş tutan oyun barədə danışıb, komandanın Avropa Liqasına düşmək şansını dəyərləndirib və mövsümün son qarşılaşması olacaq “Bakı” ilə matç haqqında fikirlərini bölüşüb. Azerisport.az həmin müsahibəni təqdim edir.
- Öncə “Qarabağ”la keçirilən oyun barədə fikirlərinizi bilmək istərdik...
- Biz bilirdik ki, “Qarabağ” doğma divarlar arasında daha yaxşı oynayan güclü komandadı. Təəssüf ki, bu oyunda “İnter”ə nəyə qadir olduğunu göstərmək müyəssər olmadı. Etiraf edim ki, rəqib daha yaxşı oynadı və buna görə də bizə qalib gəldi. Çox təəssüf ki, bu matçda məğlubiyyətə uğradıq. Hətta heç-heçə bizim üçün pis nəticə olmazdı, lakin bu qarşılaşmada bir xal qazanmaq komandaya müyəssər olmadı.
- Birinci hissədə zədə üzündən meydanı tərk etməli oldunuz. Zədəniz barədə məlumat verməyinizi istərdik...
- Bəli, mən ağrı hiss etdim və anladım ki, matçı davam etdirə bilməyəcəyəm. Ancaq həkimlər izah etdilər ki, zədə o qədər də ciddi deyil.
- Növbəti qarşılaşmada oynayacağınız artıq məlumdu?
- Bu günlərdə aydın olacaq. Ancaq həkimlər beşinci gün meydana çıxmağım üçün əllərindən gələni edəcəklərini bildirirlər. Ümid edirəm ki, hər şey yaxşı olacaq və mən belə vacib məqamda komandaya kömək edə biləcəyəm.
- “Bakı” ilə keçirilən son matç barədə nə deyə bilərsiniz?
- Bu oyun bizim üçün çox vacibdi. Biz toparlanmalı və var-gücümüzlə oynamalıyıq. Başa düşürük ki, bunu etmək asan olmayacaq. Lakin məqsədimizə nail olmaq üçün əlimizdən gələni etməyə çalışacağıq.
- Avropa Liqasına vəsiqənin taleyi məhz bu oyunun nəticəsindən asılı olacaq. Çempionatın son matçı ərəfəsində kifayət qədər mürəkkəb vəziyyət yaranıb və qalan 2 vəsiqəyə 3 komanda iddia edir.
- Bəli, turnir cədvəli doğrudan da bir qədər qarışıqdı. Lakin bizim vəzifəmiz sadədi - qələbə qazanmalıyıq və o zaman Avropanın qapıları üzümüzə açılacaq. Şansımız öz əlimizdədi və ondan tam yararlanmaq lazımdı. (klub saytı)
