9 may 2012 13:04
Azərbaycan yığması FİFA reytinqində irəlilədi
FİFA milli komandaların növbəti reytinq cədvəlini açıqlayıb. Azerisport.az xəbər verir ki, ötən ayla müqayisədə millimiz 1 pillə irəliləyib.
Belə ki, ötən ay 110-cu olan yığmamız bu dəfə 109-cu pilləni tutub. Komandamızın aktivində 305 xal var.
DÇ-2014-ün seçmə mərhələsində millimizlə birlikdə F qrupunda yer almış rəqiblərdən Portuqaliya yerində sayıb - 1190 xal 5-ci yer. Elə digər rəqiblərimiz də nə irəliləyib, nə də geriləyib. Rusiya yığması 11-ci pillədəki mövqeyində qalıb - 1049 xal. İsrail 58-ci (558 xal), Şimali İrlandiya 100-cü (338 xal), Lüksemburq 119-cu pillədədi (283 xal).
Reytinq cədvəlinə həmişəki kimi 1442 xalla İspaniya başçılıq edir. Ümumiyyətlə, ilk 8 pillədə heç bir dəyişiklik olmayıb: Almaniya (1345) ikinci, Uruqvay (1309) üçüncü, Hollandiya (1207) dördüncü, Portuqaliya beşinci, Braziliya (1165) altıncı, İngiltərə (1132) yeddinci, Xorvatiya (1114) səkkizincidi. Argentina bir pillə irəliləyərək hazırda 1076 xalla 9-cu olub. Geriləyən Danimarka isə (1069) 10-cudu.
Növbəti reytinq cədvəli iyunun 6-da açıqlanacaq.
