Novruz Əzimov: Bu, Bakıya qarşı hörmətsizlikdi

Azerisport.az sizi “Bakı”nın baş məşqçi əvəzi Novruz Əzimovun müsahibəsi ilə tanış edir.

 

- Mayın 11-də “İnter”lə Premyer Liqanın XXXII tur matçına çıxacaqsınız. Oyuna hazırlıq necə gedir?

 - Hazırlıq prosesi normaldı. Sadəcə, Uinston Parks, Aleksandr Şoliç, Maris Verpakovskis və Novruz Məmmədovun zədəli olması bizi narahat etməyə bilməz. Verpakovskis mövsümün sonunadək sıradan çıxıb. Qalan oyunçuları “Neftçi” ilə mayın 17-də keçirəcəyimiz Azərbaycan Kubokunun final matçınadək yetişdirməyə çalışırıq.

 

- “Bakı”nın Premyer Liqada mükafatçılar sırasına düşə bilməyəcəyi artıq dəqiqləşib. Bu baxımdan, “İnter”lə son oyunda ehtiyat qüvvədən yararlanmağınız mümkündürmü?

- Sözsüz ki, biz hazırda daha çox kubokun finalını düşünürük. Amma kim sıradadısa, ondan həm “İnter”, həm də “Neftçi” ilə növbəti matçlarımızda yararlanmaq niyyətindəyik.

 

- Amma əsas heyət üzvlərini “İnter”lə matçda meydana buraxmamağınız “Xəzər Lənkəran” və ya “Qarabağ” düşərgəsində birmənalı qarşılanmaya bilər…

- İstəyirlər birmənalı qarşılasınlar, istəyirlər onmənalı. “Bakı” heç vaxt çirkin oyunlarda iştirak etməyib. Kim “İnter”ə bilərəkdən uduzacağımızı düşünürsə, bizə qarşı hörmətsizliyə yol verir. Komandamız Uinston Parks, Aleksandr Şoliç kimi ön xətt oyunçularının xidmətlərindən məhrum olub. Heç kim Şoliçin hazırkı vəziyyətindən xəbərdar deyil. Halbuki əvvəlcə onun sol, sonra isə sağ almacıq sümüyü qırılıb.

 

- Şoliçin kubok matçında şlemlə meydana çıxması mümkündü?

- Hər şey tibbi müayinədən sonra məlum olacaq. Hələ kubok matçına bir həftədən çox vaxt var. Çalışırıq ki, onu sıraya qaytaraq.

 

- Aleksandr Starkovun baş məşqçiliyi dövründə çətin vəziyyətlə üzləşmiş “Bakı” artıq Avropa Liqasına vəsiqə qazanıb. Rəhbərlik sizə yeni müqavilə təklif etməyib?

- Hazırda məni bu yox, kubokun finalı düşündürür. Hər şey mövsümün yekunlarından asılı olacaq. Özüm rəhbərliyin istənilən qərarına hörmətlə yanaşacağam. Qalmağımı məsləhət görsələr, qalacağam.

 

- Bəs komandanı kimlərin tərk edəcəyi dəqiqləşib?

- İndidən ad açıqlamaq düzgün olmaz. Mövsüm yekunlaşmamış kimlərin gedəcəyini demək komandamızın digər üzvlərinə mənfi təsir edə bilər. Ona görə də hər şeyə kubokun finalından sonra aydınlıq gələcək. (lent.az)