13 may 2012 13:14
Raul rəsmən Qətər klubunda (FOTO)
İspaniya futbolunun canlı əfsanəsi Raul Qonzales özünə yeni klub tapıb. Azerisport.az xəbər verir ki, son mövsümü Almaniyanın "Schalke" klubunda keçirən Raul Qətərin "Əl-Sədd" komandası ilə anlaşıb.
Bununla bağlı xəbəri "Əl-Sədd"in rəsmi saytı da təsdiqləyib. Məlumatda deyilib ki, 34 yaşlı futbolçuyla 2012-2013-cü il mövsümünün sonuna qədər müqavilə imzalanıb.
Qeyd edək ki, daha çox “Real”dakı çıxışı ilə bütün dünyada tanınan Raul bu komandadakı ilk matçına 1994-cü ildə çıxmışdı. O, Madrid klubu ilə 6 İspaniya çempionluğunu, 3 dəfə Çempionlar Liqasını qazanmış, 16 il boyunca 228 qola imza atmışdı.
Son iki ili isə “Schalke”də keçirən futbolçu burda da yüksək səviyyəli oyunu ilə diqqət çəkdi, 66 matçda 28 qol vurdu. İspaniyalı ulduz indiyə Çempionlar Liqasında 71 qol vurub. O, həmçinin İspaniya yığmasında da 102 oyuna 44 dəfə fərqlənib.
