14 may 2012 20:28
Dünya çempionatında gümüş medal
Qvatemalanın Antiqua şəhərində gənclər arasında ağır atletika üzrə dünya çempionatı davam edir. Azerisport.az xəbər verir ki, körpücük üzərinə ilk olaraq çıxan milli komandamızın üzvü Firudin Quliyev 69 kiloqram çəki dərəcəsində mübarizə aparıb.
O, birdən qaldırma hərəkətində uğursuz çıxış edib. İlk cəhdində 130 kiloqramı başı üzərinə qaldıran idmançımız sonra sifariş verdiyi 134 kiloqramın öhdəsindən iki yanaşmada gələ bilməyib. Bu nəticə idmançımıza yalnız 11-ci olmaq imkanı verib.
Təkanla qaldırma hərəkəti isə uğurlu alınıb. Əvvəlcə 171, sonra isə 176 kiloqramın öhdəsindən gələn F.Quliyev son yanaşmasında 181 kiloqramı qaldıra bilməyib. Buna baxmayaraq, o, təkanla qaldırmada dünya çempionatının gümüş medalına sahib olub.
Toplamda 306 kiloqram (130 kq + 176 kq) nəticə göstərən atletimiz ümumi sıralamada 5-ci pillədə qərarlaşıb.
