16 may 2012 00:27
“Klub rəhbərliyi bu mütəxəssisə inanır”
Xəbər verdiyimiz kimi, “Qəbələ”nin baş məşqçi Fatih Kavlak daha bir il bu postda fəaliyyətini davam etdirəcək. Azerisport.az xəbər verir ki, klubun vitse-prezidenti Fariz Nəcəfov türkiyəli mütəxəssisin müqavilə müddətinin uzadılması barədə verdiyi açıqlamada klub rəhbərliyinin Fatih Kavlaka inandığını, ona komandanın uğur qazanması üçün hər cür dəstək veriləcəyini deyib:
“Qəbələ” mövsümün sonunda mükafatçılar sırasına düşə bilməsə də, Fatih Kavlak baş məşqçi təyin edildikdən sonra əldə olunan nəticələri qənaətbəxş hesab etmək olar. Final mərhələsində “Qəbələ” ən çox xal qazanan komanda oldu, eyni zamanda futbolçular oyun planında əvvəlki ilə müqayisədə çox daha yaxşı təsir bağışladılar. Sadalananlarda Kavlakın əməyi böyükdü. Klubdaxili iclasda bütün bunları bir daha diqqətdən keçirdik və Kavlakla müqavilənin müddətini 1 il uzatmaq qərarına gəldik. Klub rəhbərliyi türkiyəli mütəxəssisə inanır. Komandanın istənilən nəticəni əldə etməsi üçün ona hər cür dəstək veriləcək”.
