18 may 2012 16:04
Azarkeşləri liderliyini qorudu, Xəzər Lənkəran təşəkkür etdi
“Xəzər Lənkəran” azarkeşləri hər mövsüm olduğu kimi, 2011/2012 mövsümündə də ölkə üzrə ev oyunlarına gələn tamaşaçı sayına görə lider olaraq qalır. Azerisport.az xəbər verir ki, Bu mövsüm komanda ümumilikdə 19 ev oyunu keçirib – 16 oyun Premyer Liqa çərçivəsində, 2 oyun Azərbaycan Kubokunda və 1 qarşılaşma Avropa Liqasının təsnifat mərhələsində baş tutub.
Ümumilikdə rəsmi statistikaya əsasən komandanın ev oyunlarını 146200 nəfər azarkeş izləyib. Premyer Liqada ev oyunlarına gələnlərin sayı 123000 nəfər, Kubokda – 8200 nəfər, Avropa Liqasında isə 15000 nəfər təşkil edib.
Orta hesabla komandanın hər ev oyununu 7695 nəfər azarkeş izləyib. Ən çox azarkeş sayı isə Avropa Liqasının təsnifat mərhələsi çərçivəsində İsrailin “Makkabi” (Tel Əviv) klubuna qarşı keçirilmiş matçda qeydə alınıb – 15000.
O da nəzərə alınmalıdır ki, bu mövsüm “Xəzər Lənkəran” Premyer Liqa çərçivəsində iki ev oyununu tamaşaçısız keçirməli olub, Azərbaycan Kubokunun 1/8 final mərhələsində “Qaradağ-Lökbatan”a qarşı oyun isə Suraxanı qəsəbəsində baş tutmuşdu.
Başa çatan mövsüm daha bir əlamətdar hadisə ilə yadda qalıb. Belə ki, Premyer Liqanın 29-cu turunda “Neftçi”yə qarşı Lənkəranda keçirilmiş oyunda (1:0) “Xəzər Lənkəran” azarkeşlərinin Lənkəran şəhər mərkəzi stadionunda baş tutan görüşlərdə ümumi sayı 1 milyon göstəricisini aşmışdı.
Həmçinin mövsümün son üç ev oyunu “Xəzər Lənkəran” rəsmi saytı vasitəsilə Lənkərandan kənarda yaşayan azarkeşlərin diqqətinə çatdırılıb. Bu oyunlardan hər birini orta hesabla təxminən 1000 nəfər azarkeş izləmişdi ki, bu da ölkədə canlı internet yayımına eyni zamanda qoşulma baxımından ən yüksək göstəricidi.
“Xəzər Lənkəran” Futbol Klubu bütün azarkeşlərə mövsüm ərzində komandaya göstərdikləri dəstəyə görə təşəkkürünü bildirib!
