22 may 2012 11:23
Vüqar Nadirov: Sinqapur və Fələstin uğursuzluqları bu dəfə təkrarlanmayacaq
Futbol üzrə Azərbaycan yığmasının və “Qarabağ”ın hücumçusu Vüqar Nadirov sabah keçiriləcək Yaponiya, eləcə də Andorra (30 may) ilə qarşılaşmalar öncəsi fikirlərini açıqlayıb. Azerisport.az saytına müsahibəsində o, öncə bunları dilə gətirib:
“Biz Yaponiyaya qarşı yaxşı oyun nümayiş etdirmək istəyirik. Onların kifayət qədər güclü komandası var. Heyətlərində xeyli legionerlər var ki, Avropanın aparıcı çempionatlarında çıxış edirlər. Amma biz onlardan ehtiyatlanmırıq”.
“Biz Yaponiyaya qarşı yaxşı oyun nümayiş etdirmək istəyirik. Onların kifayət qədər güclü komandası var. Heyətlərində xeyli legionerlər var ki, Avropanın aparıcı çempionatlarında çıxış edirlər. Amma biz onlardan ehtiyatlanmırıq”.
Nadirovun sözlərinə görə, yoldaşlıq oyunu olduğuna görə, heyətlərdə ediləcək dəyişikliklər hər iki komandaya çətinliklər yaradacaq: “Xüsusilə komandamızda Rəşad Sadıqovun yoxluğunu qeyd edərdim. Təəssüf ki, kapitan komandasına kömək edə bilməyəcək. Onunla yanaşı daha bir neçə heyətdə yer almır. Lakin heyətimizdə onları layiqincə əvəzləyə biləcək uşaqlar var. Gənc futbolçularımız da belə rəqiblə qarşılaşmada özlərini yaxşı tərəfdən göstərməlidilər”.
Vüqar yaponların da heyətində aparıcı futbolçulardan Keysuke Hondanın çıxışının sual altında olmasına toxunub: “Təbii ki, əgər o, oynamasa, üzücü olar. Yaponiyanın güclü heyətində qarşı oynamaq istərdik. Lakin digər tərəfdən yaponların hansı heyətlə meydana çıxması bizim üçün o qədər vacib də deyil. İstənilən halda onlar güclü komanda olduqlarını sübut ediblər”.
Nadirov daha sonra qarşıdakı Almaniya toplanışından və Andorra ilə görüşdən də söz açıb: “Almaniyaya da qələbə üçün gedirik. Lakin Andorranı zəif rəqib hesab etmək olmaz. Son seçmə mərhələdə də bu komanda bütün rəqibləri üçün əsl başağrısına çevrilmişdi. Ona görə də rəqibi qiymətləndirməmək sonra komandamıza baha başa gələ bilər”.
“Qarabağ”ın forvardı sonda bunları dilə gətirib: “Əlbəttə, Yaponiya ilə oyunumuz Andorra ilə qarşılaşmayla müqayisədə daha çətin keçəcək. Bu komanda Asiya kubokunun hazırkı sahibidi. Andorraya gəlincə, onları da məğlub etməyə çalışacağıq. Dubay toplanışı zamanı Sinqapur və Fələstinlə oyunlardakı uğursuzluqlar bu dəfə təkrarlanmayacaq”.
