23 may 2012 13:54
Azərbaycanda keçiriləcək DÇ-nin püşkatma tarixi müəyyənləşdi
Məlum olduğu kimi, sentyabr ayının 22-dən başlayaraq Azərbaycanda 21 gün davam edəcək FIFA U-17 qadınlararası dünya çempionatı keçiriləcək. Azerisport.az xəbər verir ki, Azərbaycan-2012-də 16 ölkənin millisi qalibiyyət üçün yarışacaq.
Artıq sözügedən DÇ-nin püşkünün nə vaxt atılacağı da müəyyənləşib. Belə ki, mundialın püşkü iyulun 6-da Bakıda atılacaq.
Qeyd edək ki, DÇ-2012-nin oyunları Bakı və Lənkəranda baş tutacaq. Azərbaycan dünyanın 15 müxtəlif ölkəsindən milli yığma komandaları və azarkeşləri qəbul edəcək. Artıq çempionat həyacanını yaşayacaq 16 komandanın 14-ü məlumdu. Öncəliklə qeyd edək ki, ölkəmiz bu çempionatda iştirak etməyə ev sahibi statusu almaqla avtomatik olaraq haqq qazanıb. Dünyanın bütün mədəniyyətlərinin bir araya gələcəyi çempionatda Asiyanı Şimali Koreya, Yaponiya və Çin təmsil edəcək. Afrika qitəsi Qambiya, Nigeriya və Qana milli yığma komandaları ilə təmsil olunacaq. Cənubi Amerikanı Braziliya, Kolumbiya və Uruqvay yığmaları təmsil edəcək. Yeni Zelandiya, Amerika Birləşmiş Ştatları, Kanada, Meksika millisi də Azərbaycana bilet əldə edənlər sırasına qoşulublar. 26-29 iyun tarixləri arasında İsveçrənin Nyon şəhərində baş tutacaq final mərhələnin oyunlarında 2 komanda daha çempionatda iştirak üçün Azərbaycana gəlməyə haqq qazanacaq.
