1 iyun 2012 17:54
Rövnəq Abdullayev: Bu, çox ciddi layihə olacaq
AFFA prezidenti Rövnəq Abdullayev bu gün Gürcüstan Futbol Federasiyasının prezidenti Zviad Siçinava ilə görüş keçirib və AÇ-2020-nin birgə keçirilməsi ilə bağlı bir sıra mühüm müzakirələr aparıb. Azerisport.az xəbər verir ki, görüşdən sonra mətbuata açıqlamasında Abdullayev bunları söyləyib:
“Bizim gürcüstanlı həmkarlarımızla yaxşı və məhsuldar görüşümüz baş tutdu. AÇ-2020-ni Azərbaycan və Gürcüstanın birgə keçirməsi ilə bağlı müzakirələr apardıq. Bu, çox ciddi bir layihə olacaq. İnanıram ki, iki ölkə federasiyasının və dövlətlərimizin gücü sayəsində biz bu qitə çempionatını keçirməyə nail olacağıq. Avroviziya zamanı ölkəmizə çoxlu sayda turist gəlmişdi. Bu, turizmin inkişafında önəmli bir addım oldu. AÇ-2020-nin təşkil olunmasıyla biz daha mühüm uğurlar əldə edə bilərik. Çünki futbol Avropada çox populyardı”.
Rövnəq Abdullayev stadion və şəhərlərlə bağlı məqamların hələ tam dəqiqləşmədiyini dilə gətirib: “Biz hələ bundan sonra kimdə beş, kimdə dörd stationun olacağına aydınlıq gətirəcəyik. Otel və aeroport baxımından problem yoxdu. Qalır təkcə şəhərləri müəyyənləşdirmək. Məlum standartlar var, bunları da nəzərə almağa məcburuq. Çox güman ki, UEFA hələ bizim 17 yaşadək qızlardan ibarət yığmalar arasında baş tutacaq DÇ-2012-ni necə təşkil edəcəyimizə də baxacaq. Biz bu turniri yüksək səviyyədə yola verməliyik ki, AÇ-2020 uğrunda mübarizədə də şanslarımız artsın”.
